माळशिरस (बंडखोर वृत्तसेवा): जनसंघाचे भाजपात रूपांतर झाल्यापासून भाजपाची शिस्त वाखाणण्याजोगी होती. मात्र शिस्तप्रिय पक्ष अशी ओळख असलेल्या भाजपाला मुख्यमंत्री देवेंद्र फडणवीस यांचे स्वयंघोषित मानसपुत्र राम सातपुते यांनी सुरूंग लावल्याने भाजपाच्या जुन्या जाणत्या कार्यकर्त्यांतून तीव्र नाराजी व्यक्त करण्यात येत आहे.

पराभवात सुध्दा दिलदारपणा असावा लागतो. कर्जत-जामखेड मतदारसंघात ना. राम शिंदे यांचा पराभव झाल्यानंतर त्यांनी मोठ्या मनाने पराभव स्वीकारून रोहित पवार यांचे अभिनंदन केले होते. कारण त्यांच्यात राजकीय प्रगल्भता होती. भाजपाच्या जुन्या जाणत्या नेत्यांसह कार्यकर्त्यांमध्ये सुध्दा ही प्रगल्भता आहे. ॲड. सौ. संजीवनीताई पाटील आजारी असताना सोलापूरच्या हॉस्पिटलला विजयसिंह मोहिते पाटील, रणजितसिंह मोहिते पाटील भेटायला गेले होते. तर घरी आल्यानंतर सुद्धा विजयसिंह मोहिते पाटील यांनी आजाराची चौकशी करण्यासाठी माळशिरस निवासस्थानी भेट दिली. एवढा जिव्हाळा पूर्वी मोहिते पाटील व त्यांच्या विरोधकांमध्ये होता. ॲड. सौ. संजीवनीताई पाटील यांनी मोहिते पाटलांना तीन वेळा प्रचंड विरोध करून सुद्धा एकमेकांबद्दल त्यांना आस्था होती. मात्र ऊसतोड मजुराचा मुलगा म्हणून माळशिरस तालुक्याचे आमदार झाल्यानंतर पुन्हा एकदा २०२४ साली त्यांचे आमदार होण्याचे स्वप्न अधूरे राहिल्याने राम सातपुते यांचा तिळपापड झाला आहे. ऊठसूठ मोहिते पाटलांवर टीकेची झोड उठवून व त्यांच्याविरोधात वक्तव्ये करून नेहमी प्रसिध्दीच्या झोतात राहण्याचा ते केविलवाणा प्रयत्न करीत असले तरी आता जनतेने त्यांना चांगलेच ओळखले आहे. वास्तविक पाहता धनगर आमदार नको म्हणून माळशिरस तालुक्यातील बहुतांशी मराठा समाजाच्या नेत्यांनी व बोगस दाखल्यामुळे एससी समाजाने उत्तम जानकरांना मतं न देता राम सातपुते यांना मतं दिली होती. त्यामुळे ते एक लाख आठ हजार मतं घेऊ शकले. परंतु ती मतं माझी हक्काचीच आहेत या अविर्भावात वावरून ते बेडकासारखे फुगत असल्याचे दिसत आहे. मात्र बेडूक कितीही फुगला तरी तो बैल होऊ शकत नाही याचे भान राम सातपुते यांना राहिले नाही. कालांतराने राम सातपुते हे मोहिते पाटलांच्या विरोधात सारखेच विष ओकत असल्याने ज्या लोकांनी त्यांना मतं दिली होती त्यांना याचा पश्चाताप झाला, काहींनी त्यांना हे बोलूनही दाखवल्याची चर्चा आहे. दरम्यान मोहिते पाटील विरोधक म्हणून काम करणारे माळशिरस तालुक्यात बरेच नेते आहेत. पण ते कधीही इतक्या खालच्या पातळीवर गेले नाहीत. माळशिरस तालुक्यातील विरोधकांनी मोहिते पाटलांना तात्विक विरोध केला. ॲड सुभाष आण्णा पाटील, ॲड. सोमनाथ वाघमोडे, के. के. पाटील, ॲड. संजीवनी पाटील, आ. उत्तम जानकर, राजकुमार पाटील या सर्वांनी विरोधक म्हणून काम करीत असताना तात्विकच विरोध केला. परंतु राम सातपुते हे आपल्या पराभवाने सैरभैर झाले असून पक्षशिस्तीला त्यांनी फाट्यावर मारले आहे. त्यामुळे भाजपा पक्षाची प्रतिमा मलीन होत असल्याने मुख्यमंत्री देवेंद्र फडणवीस यांचे स्वयंघोषित मानसपुत्र राम सातपुते यांना पक्षश्रेष्ठी कधी लगाम घालणार? असा सूर निष्ठावंत भाजपा कार्यकर्त्यांतून उमटत आहे.