माळशिरस (बंडखोर वृत्तसेवा): भाजपाचे उपरे माजी आमदार राम सातपुते यांच्या मागेपुढे फिरुन काही नगराध्यक्ष व नगरसेवकांनी माळशिरस नगरपंचायतीला फॅमिली कट्टा बनवून संपूर्ण नगरपंचायतीला भुजंगासारखा विळखा घातला आहे. नगरपंचायत हद्दीतील विकासकांसाठी शासनाने दिलेला निधी मंजूर झालेल्या कामांच्या ठिकाणीच वापरण्याऐवजी माजी नगराध्यक्ष व विद्यमान नगरसेवक स्वतःच्या शाळेच्या हद्दीत आणि घराजवळ वापरुन आपली प्रॉपर्टी वाढविण्यासाठी मश्गुल असल्याची चर्चा आहे. त्याचबरोबर आजी-माजी नगराध्यक्ष, अपवाद वगळता टक्केवारीवर जगणारे नगरसेवक व प्रशासनातील काही भ्रष्टाचारात अग्रेसर असणारे (शेणातील किडे वळवळ करतात त्या पद्धतीने कधी इकडे कधी तिकडे अशा पद्धतीने सर्वांना खूष ठेवून स्वतःच्या झोळ्या भरण्याचं काम करणारे) यांनी या पाच वर्षात स्वतःचीच प्रॉपर्टी वाढवून माळशिरस नगरपंचायतीचा निधी स्वतःच्याच घशात घातल्याची चर्चा माळशिरस शहरात खुलेआम होताना दिसत आहे.

नगरपंचायत बांधकाम विभागांमध्ये काही दिवसांपूर्वी विशाल सावंत हा मागासवर्गीय कर्मचारी काम करीत होता. मात्र तो नगराध्यक्ष- नगरसेवक सांगतील त्या चुकीच्या पद्धतीने काम करीत नसल्याने त्याची उचलबांगडी करून त्याच्या ठिकाणी सुमित पवार या कंत्राटी कर्मचाऱ्याची कशी काय नेमणूक केली? अशी चर्चा माळशिरस नगरपंचायतीत होताना दिसत आहे. तसेच बांधकाम विभागातील अनेक कामे बोगस म्हणजे कागदावरच पूर्णत्वास गेलेली असून या कामाबद्दल मागणी करणाऱ्याला दम दिला जातो. त्यामुळे नागरिक या कामांबद्दल माहिती मागत नाहीत तर नगरसेवक पदाच्या व त्यांना मिळणाऱ्या टक्केवारीच्या बदल्यात त्यांना पाठिंबा देत आहेत अशीही चर्चा सुज्ञ नागरिकांतून होत आहे. 

माळशिरस नगरपंचायतकडून महाराष्ट्र सुवर्ण जयंती नगरोत्थान अभियान (जिल्हास्तर), नागरी दलितेतर वस्ती सुधार योजना व लोकशाहीर अण्णाभाऊ साठे नागरी वस्ती सुधारणा वैशिष्ट्यपूर्ण योजना या योजनेअंतर्गत 2024-2025 करिता विविध विकासकामे मंजूर झाली आहेत. यामध्ये माळशिरस नगरपंचायत क्षेत्रात व्यायाम शाळा बांधण्यासाठी 70 लाख 1 हजार 343 रुपये, याच हद्दीत व्यायाम शाळा हॉल बांधण्यासाठी 22 लाख 813 रुपये व माळशिरस शहरातील गट नंबर 1003 मध्ये व्यायामशाळा बांधण्यासाठी 49 लाख 2 हजार 772 रुपये अशाप्रकारे तीन ठिकाणी मिळून फक्त व्यायाम शाळांसाठी 1 कोटी 41 लाख 4 हजार 928 रुपये इतका निधी मंजूर झालेला आहे. मात्र सदरच्या व्यायामशाळांचे बांधकाम माजी नगराध्यक्षांच्या घराजवळ सुरू असल्याची जोरदार चर्चा आहे. तर माळशिरस शहरातील ज्येष्ठ नागरिकांसाठी विरंगुळा केंद्र बांधण्यासाठी 49 लाख 3 हजार 47 रुपये, माळशिरस नगरपंचायत क्षेत्रातील प्रभाग क्रमांक 12 येथे शिक्षक कॉलनीत नगरपंचायतचे सभागृह बांधण्यासाठी 44 लाख 999 रुपये, त्याच प्रभागात वाचनालय हॉल बांधण्यासाठी 20 लाख 139 रुपये आणि त्याच प्रभागातील ओपन स्पेस विकसित करण्यासाठी 32 लाख 85 हजार 581 रुपये अशाप्रकारे निधी मंजूर करण्यात आला आहे. हा निधी मंजूर झाल्याचे पत्र 10 डिसेंबर 2024 रोजी माळशिरस नगरपंचायतने प्रसिद्ध केलेले असताना या कामांबाबत मुख्याधिकाऱ्यांकडे विचारणा केली तर कामे अजून सुरू झाली नसल्याचे त्यांचेकडून उत्तर दिले जात आहे. मात्र यापैकी काही कामे माजी नगराध्यक्ष यांच्या खाजगी शाळेच्या आवारात आणि घराजवळ सुरू असल्याची व काही कामे कागदावरच दाखवून लाखो रुपयांचा निधी माजी नगराध्यक्ष व नगरसेवकांनी लाटल्याची चर्चा माळशिरस शहरात होत आहे. त्यामुळे माळशिरस नगरपंचायतीची चौकशी लवकरात लवकर व्हावी अशी ग्रामस्थातून मागणी जोर धरत आहे.