अकलूज (बंडखोर वृत्तसेवा): मूकनायक प्रतिष्ठान, अकलूज यांचे वतीने दिला जाणारा मानाचा मूकनायक या विधिज्ञ क्षेत्रातील पुरस्कारासाठी ॲड. सुमित सावंत यांची निवड करण्यात आली असून रविवार दिनांक 16 मार्च 2025 रोजी अकलूज येथे होणाऱ्या मूकनायक परिसंवाद या कार्यक्रमामध्ये आमदार राजू खरे आणि फिनिक्स अकॅडमीचे संचालक नितेश कराळे मास्तर यांचे शुभहस्ते पुरस्कार देऊन गौरविण्यात येणार असल्याचे मूकनायक प्रतिष्ठान, अकलूज यांचे वतीने जाहीर करण्यात आले आहे.

ॲड. सुमित सावंत यांनी सन २०१४ सालापासून माळशिरस येथे दिवाणी, फौजदारी व महसुली क्षेत्रामध्ये वकिलीचे काम सुरु करुन प्रसंगी नाममात्र फी अथवा नि:शुल्क कायदेशीर सहाय्य व अनेक गोरगरीब लोकांना मदत करण्याचे काम केले. तसेच विविध सामाजिक संघटना, वर्तमानपत्रे तथा राजकीय पक्ष यांचे अधिकृत कायदेशीर सल्लागार म्हणून काम पाहिले आहे. लहानपासूनच वेगवेगळ्या आंदोलनामध्ये उत्स्फूर्त सहभाग, आंबेडकरी चळवळीचा प्रभाव असल्याने कुमार वयापासून सामाजिक कामाची आवड, विविध स्पर्धा आयोजित करुन सामाजिक उपक्रम सादर करणे, भारतीय संविधानाच्या जनजागृतीसाठी सतत प्रयत्न केले आहेत. जागर संविधानाच्या अंतर्गत विविध समाज उपयोगी उपक्रम राबविले. अतिशय कमी वयामध्ये वकीली क्षेत्रामध्ये नावलौकीक मिळवून मोजक्या वकीलांच्या पंक्तीत जावून  चांगल्याप्रकारे वकीली चालवत असताना सुध्दा सामाजिक भान व समाजाप्रती असणारे प्रेम जोपासत सर्वसमावेशक, सर्वांना सोबत घेऊन सामाजिक कार्य अखंडपणे सुरु ठेवले आहे याची दखल घेऊन मूकनायक प्रतिष्ठान, अकलूज यांचे वतीने पुरस्कार जाहीर केल्याचे म्हटले आहे.