अकलूज (बंडखोर वृत्तसेवा): उद्योगरत्न उदयसिंह मोहिते पाटील यांचे सूपुत्र शिवतेजसिंह मोहिते पाटील यांना राजकीय संधी मिळताच त्यांनी संधीचे सोने केले. जनतेशी हसतमुखाने संवाद साधून त्यांच्यामध्ये मिसळून शिवतेजसिंहांनी त्यांचे विविध प्रश्न मार्गी लावले. त्यामुळे आपल्या स्वभावगुणांनी ते अल्पावधीतच माळशिरस तालुक्यासह माढा विधानसभा मतदारसंघातही घराघरात पोहचले होते. मला आमदारकी मिळावी यासाठी अनेकजण धडपडत असतात. परंतु शिवतेजसिंहांना माढा विधानसभा मतदारसंघात जनतेतून आमदारकी मिळत असतानाही ते रणजितसिंहांना डोईजड होऊ नयेत म्हणूनच शिवरत्नने त्यांचे पंख छाटल्याची चर्चा शिवरत्नवरील बहुतांशी कार्यकर्ते करताना दिसत आहेत. माढा विधानसभा मतदारसंघातून शिवतेजसिंहांना उमेदवारी मिळाली असती तर ते नक्कीच आमदार झाले असते. परंतु आमदारकीच्या रेसमधल्या शिवतेजसिंहांना विविध कार्यकारी सोसायटीचे संचालक बनवून शिवरत्नचा गोतावळा त्यांची मुस्कटदाबी करीत असल्याचे दिसत आहे.
शिवरत्न बंगला हे सोलापूर जिल्ह्याचे सत्ताकेंद्र बनत असताना सहा भावांची एकत्र ताकद होती. विजयसिंह मोहिते पाटील यांनी महाराष्ट्रात, स्व. प्रतापसिंह मोहिते पाटील सोलापूर जिल्ह्यात, जयसिंह मोहिते पाटील माळशिरस तालुक्यात नेतृत्व करायचे, तर अकलूजमध्ये धैर्यशील मोहिते पाटील यांनी नेतृत्व करायचे अशी शिवरत्नची राजकीय रणनिती होती. तसेच मदनसिंह मोहिते पाटील यांनी सहकारी संस्था व राजसिंह मोहिते पाटील यांनी शेतीला वाहून घेतले. परंतु उद्योगमहर्षि उदयसिंह मोहिते पाटील हे एक वेगळा चेहरा होते. उदयसिंह मोहिते पाटील यांनी आपल्या ज्ञानाचा व कल्पकतेचा वापर करून शिवरत्न कन्स्ट्क्शनसह इतर उद्योजक उभे करून एक प्रचंड आर्थिक स्त्रोत निर्माण केला आणि राजकारणाला जो आर्थिक सपोर्ट लागतो तो त्यांनी विजयसिंहांच्या मागे उभा केला. पण दुसऱ्या पिढीतील फळी म्हणून रणजितसिंहांना विजयसिंहांची जागा घेता आली नाही. रणजितसिंहांची सगळी राजकीय समीकरणे चुकली. त्यामुळे त्यांना निवडणूक लढवून महाराष्ट्राच्या राजकारणात झेप घेता आली नाही. धैर्यशील मोहिते पाटील यांचे तर विरोधक अमाप! परंतु महाविकास आघाडीच्या हवेत अपघाताने ते खासदार झाले. संग्रामसिंह तर अकलूजमधील एका वॉर्डात पराभूत होतात यावरून त्यांना गिणतीतही धरू नये इतके कुचकामी नेतृत्व संग्रामसिंहांचे आहे. मात्र उद्योग जगतामध्ये बिझनेसमॅन व संघटन कौशल्याने राजकारणात आपला ठसा उमटवायला शिवतेजसिंह हे रणजितसिंह व धैर्यशील यांच्यापेक्षाही उजवे निघाले. आपल्या संघटन कौशल्याच्या जोरावर व सर्वांशी आपुलकीने बोलून शिवतेजसिंह यांनी लोकांवर आपली मजबूत पकड निर्माण केली. जे रणजितसिंहांना जमले नाही, धैर्यशील यांना जमले नाही, संग्रामसिंहांना जमले नाही ते त्यांनी करून दाखवले. माढा विधानसभा मतदारसंघातून त्यांची लोकप्रियता पाहता ते सहज निवडून आले असते. पण शिवरत्नने अभिजीत पाटलांना पुढे केल्याने शिवतेजसिंहांना दोन पावले मागे सरावे लागले. दरम्यानच्या काळात पुलाखालून बरेचसे पाणी वाहून गेले. शिवरत्नच्या राजकारणाची किंमत त्यांच्या शिवरत्न कन्स्ट्रक्शनला मोजावी लागली. काही काळ शिवतेजसिंहांसाठी तणावपूर्ण गेला. आपले व्यावसायिक नुकसान होत असतानाही शिवरत्नवरील त्यांचा गोतावळा राजकीय सत्तेपासूनही दूर ढकलू लागला. येणाऱ्या अकलूज नगरपरिषद निवडणुकीत सयाजीराजे यांना पुढे आणण्यामागे खासदार धैर्यशील मोहिते पाटील यांचा खूप मोठा हात आहे. कारण धैर्यशील यांना खासदार करण्यासाठी सयाजीराजे यांचे आजोबा जयसिंह मोहिते पाटील, वडील संग्रामसिंह मोहिते पाटील व आत्या स्वरूपराणी मोहिते पाटील हे सर्वजण फिरत होते. परंतु सयाजीराजे यांची उमेदवारी अकलूजकरांना रुचणारी नाही. शिवतेजसिंह मोहिते पाटील अकलूज ग्रामपंचायतचे सरपंच झाल्यानंतर त्यांनी खूप चांगल्या पध्दतीने काम करून अकलूजकरांना आपलेसे केले आहे. शिवतेजसिंह हे एका गावापुरते मर्यादित नसून तालुक्याचे नेतृत्व करण्याची धमक त्यांच्यामध्ये आहे. मात्र त्यांना जाणीवपूर्वक डावलून सयाजीराजे मोहिते पाटील यांना पुढे आणले जात आहे. त्यामुळे अकलूजमध्ये काही प्रमाणात दबक्या आवाजात नाराजीचा सूर उमटत आहे. शिवतेजसिंहांना अकलूज विविध कार्यकारी सोसायटीचे संचालकपद देऊन रडक्याचे डोळे पुसण्याचा हा केविलवाणा प्रयत्न आहे. हे पद एखादा छोटा कार्यकर्ता नाराज होऊ नये यासाठी दिलेले असते. परंतु या पदापेक्षा शिवतेजसिंह कित्येक पटीने मोठे आहेत. दरम्यान शिवरत्नने धैर्यशील यांच्या राजकीय हट्टापायी २०१२ साली प्रतापगडाला दूर केले, त्याप्रमाणे शिवतेजसिंहांचे खच्चीकरण करून शिवरत्नमधील गोतावळ्यात दुहीची बीजे रूजवू नयेत अशा भावना अकलूजकरांतून व्यक्त केल्या जात आहेत.