सदाशिवनगर उपकेंद्रातही कर्मचारी गैरहजर

वरमाई शिंदळ तर वराड का नको या म्हणीचा प्रत्यय येत असल्याची नागरिकात चर्चा

माळशिरस (बंडखोर वृत्तसेवा): तालुक्यातील पुरंदावडे या राष्ट्रीय महामार्ग क्र. ९६५ वरील अतिमहत्त्वाच्या असणाऱ्या प्राथमिक आरोग्य केंद्रातील वैद्यकीय अधिकारी (कंत्राटी) डॉ. वैभवी मारकड, आरोग्य सहायिका संगीता कदम, आरोग्य सेविका उज्वला भानवसे, तसेच सदाशिनगर आरोग्य उपकेंद्रातील आरोग्य सेविका मिनाक्षी शिंगाडे आदी अधिकारी-कर्मचारी वेळेत उपस्थित नसल्यामुळे स्थानिक नागरिकांना वेळेत सुविधा उपलब्ध होत नाहीत. याबाबत सामाजिक कार्यकर्ते सुनील ओवाळ यांनी जिल्हा आरोग्य अधिकारी डॉ. संतोष नवले यांचेसह तालुका वैद्यकीय अधिकारी डॉ. प्रियंका शिंदे-महाडिक यांच्याकडे टेलिफोनिक तक्रार दाखल केली आहे.

याबाबत सविस्तर माहिती अशी की, शनिवारी सकाळी ०९ वाजून १५ मिनिटांनी पुरंदावडे येथील प्राथमिक आरोग्य केंद्र येथे सामाजिक कार्यकर्ते सुनील ओवाळ गेले असता त्या ठिकाणी कोणीही उपस्थित नव्हते. याबाबत चौकशी केली असता डॉ. वैभवी मारकड यांची त्या ठिकाणी ड्युटी होती. तसेच आरोग्य सहायिका संगीता कदम आरोग्य सेविका उज्वला भानवसे यांच्यासह इतर कर्मचारी उपस्थित नव्हते. काही वेळानंतर औषध निर्माता जाधव त्या ठिकाणी आले. डॉ. वैभवी मारकड या मारकडवाडी या गावावरून ये-जा करीत असतात, आरोग्य सहायिका संगीता कदम या नातेपुते येथून ये-जा करीत असतात, तर आरोग्य सेविका उज्वला भानवसे या माळशिरसवरून ये-जा करीत असतात. विशेष म्हणजे पुरंदावडे प्राथमिक आरोग्य केंद्राच्या ठिकाणी अतिशय चांगल्या पद्धतीच्या क्वार्टर्स व इतर सुविधा उपलब्ध आहेत. याच पध्दतीने पुरंदावडे प्राथमिक आरोग्य केंद्राच्या अधिनस्त आरोग्य उपकेंद्र सदाशिवनगर (जगतापवस्ती) येथील आरोग्य सेविका मिनाक्षी शिंगाडे याही शनिवारी ९.३० वाजता कर्तव्यावर हजर नव्हत्या. त्या ठिकाणी अद्यावत सुविधांनी परिपूर्ण अशा उपकेंद्रात न राहता सदाशिवनगर गावात राहतात. तरीही अवघ्या १ किमी अंतरावरील आरोग्य उपकेंद्रात त्या वेळेवर कधीही वेळेत हजर राहत नसल्याचे काही नागरिकांकडून समजले. अशी एक ना अनेक, या-ना त्या कारणाने पुरंदावडे आरोग्य केंद्राची सातत्याने तालुक्यात चर्चा होत असताना सुद्धा येथील उपस्थित वैद्यकीय अधिकारी व इतर कर्मचारी वर्ग यांचेवर कोणताही परिणाम होत नाही ही खूप खेदजनक घटना आहे. यापूर्वीही सुट्टी नसताना या प्राथमिक आरोग्य केंद्राने सुट्टी घेतली होती. त्यावेळेसही सुनील ओवाळ यांनी पाठपुरावा केला. मात्र वरिष्ठ अधिकाऱ्यांनी या ठिकाणच्या कर्मचाऱ्यांना पाठीशी घातले. आताही वरिष्ठ काय निर्णय घेतात ते बघूया असे सुनील ओवाळ यांनी बंडखोरशी बोलताना म्हटले.