अकलूज (बंडखोर वृत्तसेवा): बहुतांशी पोलिस अधिकारी आपल्या दंडुकेशाहीच्या दहशतीने गावाला, विभागाला शांत ठेवण्याचे काम करीत असतात. मात्र अकलूज विभागाचे डीवायएसपी नारायण शिरगावकर यांनी प्रेमाने माणसांना जवळ करुन विविध क्षेत्रातील लोकांच्या क्रिकेट टीम बनवत सलोखा चषकच्या माध्यमातून लोकांमध्ये सलोखा जपण्याचे काम केल्याने सर्वच क्षेत्रातून त्यांच्यावर अभिनंदनाचा वर्षाव केला जात आहे. त्यांच्या या संकल्पनेचा महाराष्ट्राने आदर्श घेऊन पोलिस प्रशासनाने लोकांशी सलोखा राखण्यासाठी प्रयत्न करावेत असे माळशिरस तालुक्यातील लोकांतून बोलले जात आहे.
माळशिरस तालुक्यातील प्रत्येक क्षेत्रात काम करणारे अधिकारी, कर्मचारी, वकील, डॉक्टर, पत्रकार, पोलिस यांच्यासह अनेकजण आपापल्या कामाच्या व्यापात मग्न असत. कुणाला कुणाचे देणेघेणे नाही अशा अविर्भावात ते वावरत होते. वास्तविक पाहता क्रिकेट खेळ हा लहानांपासून थोरांपर्यंत सर्वांच्या आवडीचा! त्यामुळे पूर्वी बरेचजण क्रिकेट खेळणारे कालांतराने या खेळापासून विभक्त झाले होते. परंतु सातत्याने व्यायाम करुन आयर्न मॅनचा किताब पटकाविण्याचा निश्चय केलेले डीवायएसपी नारायण शिरगावकर यांना आपल्या परिसरात विविध क्षेत्रात काम करणाऱ्या लोकांना एकत्रित करून त्यांच्यामध्ये सलोखा जपण्यासाठी सलोखा चषक सुरू करावा अशी संकल्पना सुचली. त्यामुळे त्यांनी पोलीस अधीक्षक सोलापूर ग्रामीण श्री. अतुल कुलकर्णी यांचे प्रेरणेतून व अप्पर पोलीस अधीक्षक श्री. प्रितम यावलकर यांच्या मार्गदर्शनाखाली माळशिरस तालुक्‍यात प्रशासकीय विभाग व इतर कार्यक्षेत्रातील कार्यरत असणारे नागरिक यांच्यात एकजुटीचे दर्शन घडविणारे “सलोखा चषक” – २०२५ पर्व ०१ ले किकेट सामन्याचे आयोजन दिनांक २५/०१/२०२५ व दिनांक २६/०१/२०२५ रोजी विजयसिंह मोहिते पाटील किडा संकुल, अकलूज याठिकाणी केले. यात प्रशासकीय विभागातून १) तहसिल कार्यालय, माळशिरस २) सार्वजनिक बांधकाम विभाग, माळशिरस ३) पोलीस विभाग, माळशिरस ४) महावितरण विभाग, माळशिरस ५) नगरपरिषद, अकलूज ६) पंचायत समिती, माळशिरस ७) जलसंपदा विभाग, माळशिरस ८) पोलीस पाटील, माळशिरस ९) जिल्हा परिषद शिक्षक संघ, माळशिरस हे संघ सामील झाले होते. तर इतर कार्यक्षेत्रातील कार्यरत असणाऱ्या नागरिकातून १) डॉक्टर- ११, २) पत्रकार संघ, अकलूज, ३) ४० प्लस वयोगट, माळशिस, ४) आक्रमक – ११ फोटो अँन्ड ग्रॉफिक्स टीम, ५) वकील संघटना, माळशिरस, ६) फार्मसी टीम, अकलूज, ७) लॅब स्टाफ, अकलूज, ८) शिक्षण प्रसारक मंडळ, अकलूज, ९) एम.आर.टीम अकलूज हे संघ सहभागी झाले. प्रशासकीय विभाग विरूध्द इतर कार्यक्षेत्रातील कार्यरत असणारे नागरिक यांच्यात क्रिकेट सामने बाद पध्दतीने खेळवले गेले.
सदर सामन्यांमध्ये क्रमांक ४० प्लस वयोगट, माळशिस या संघाने विजय मिळविला व फार्मसी टीम, अकलूज हा संघ उपविजेता ठरला. विजेता व उपविजेत्या संघास आकर्षक “सलोखा चषक” – २०२५ ची ट्रॉफी देण्यात आली. सहभागी होणाऱ्या प्रत्येक खेळाडूंना वनपरिक्षेत्र अधिकारी, माळशिरस यांच्याकडून देशी जातींची फळझाडे देण्यात आली.
सलोखा चषक सामन्याकरिता मैदान नगरपरिषद, अकलूज यांनी उपलब्ध करून दिले. प्रशासनातील सर्व विभागाने या स्पर्धेकरिता सहकार्य केले आहे. माळशिरस क्रिकेट असोसिएशन व माळशिरस टेनिस बॉल किकेट असोसिएशन यांचे नियोजनामध्ये चांगले सहकार्य लाभले.
सामन्याचा आनंद घेण्यासाठी व आपापल्या संघांना प्रोत्साहन देण्यासाठी प्रशासकीय विभागातील प्रमुख अधिकारी, कर्मचारी वर्ग तसेच इतर नागरिकांच्या खेळाडूंना प्रोत्साहन देण्यासाठी त्यांचे पदाधिकारी सहकारी, तसेच मित्रपरिवार हे मोठ्या प्रमाणात सहभागी झाले होते. अतिशय खेळीमेळीच्या वातावरणात व कोणतेही गालबोट न लागता “सलोखा चषक” – २०२५ पर्व ०१ ले अतिशय उत्साहात संपन्न झाले. त्यामुळे जनतेतून डीवायएसपी यांचे कौतुक करण्यात येत आहे.
डीवायएसपी नारायण शिरगावकर हे पुढच्या वर्षी होणाऱ्या आयर्न मॅन या स्पर्धेची तयारी करीत आहेत. ते दररोज १०० किमी सायकलिंग व नॉनस्टॉप १५ किमी रनिंग करीत आहेत. त्यामुळे फिटनेसचे महत्त्व त्यांना चांगलेच माहित आहे. विविध क्षेत्रात काम करणाऱ्या लोकांना सलोखा चषकच्या माध्यमातून खेळाकडे परावर्तित करण्याचे काम डीवायएसपी नारायण शिरगावकर यांनी केले आहे. त्यामुळे हाच पॅटर्न महाराष्ट्रात राबवून पोलिस प्रशासनाने डीवायएसपी नारायण शिरगावकर यांच्याप्रमाणे पोलिस व विविध क्षेत्रात काम करणाऱ्या लोकांमध्ये समन्वय साधण्याचा प्रयत्न करावा अशी लोकांतून चर्चा केली जात आहे.