पिस्तूलाचे राजकारण…!

माळशिरस (बंडखोर वृत्तसेवा): गेल्या तीन वर्षांपूर्वी ज्या धैर्यशील मोहिते पाटलांनी सोमनाथ हुलगे यांच्या डोक्याला पिस्तूल लावले त्यांचेच कार्यकर्ते रामभाऊ सातपुते समर्थकांच्या कंबरेला पिस्तूल लावल्याचे फोटो व्हायरल करतायत. खासदार धैर्यशील मोहिते पाटील यांच्या अवतीभवती असलेल्या बहुतांशी कार्यकर्त्यांकडे परवान्यांचे पिस्तूल आहेत. तर काही कार्यकर्त्यांकडे गावठी कट्टे असल्याचेही बोलले जात आहे. मात्र आपल्याच बुडाखाली अंधार असताना मोहिते पाटील समर्थक माजी आमदार रामभाऊ सातपुते यांचे कार्यकर्ते राहुल रुपनवर व हरी पालवे यांच्या कंबरेला लावलेले पिस्तूलाचे फोटो व्हायरल करुन रामभाऊ सातपुते माळशिरस तालुक्यात बीडसारखी परिस्थिती निर्माण करीत असल्याचे बोलत आहेत. पण काचेच्या महालात राहणाऱ्यांनी दुसऱ्यांच्या घरांवर दगडफेक करु नये अशा प्रतिक्रिया जनतेतून उमटत आहेत.

मोहिते पाटलांनी गेल्या ४० वर्षांच्या सत्ताकाळात आपल्या गुंड प्रवृत्तीच्या कार्यकर्त्यांमार्फत विरोधकांवर दडपशाहीच लादली होती. मोहिते पाटलांचे पूर्वीचे अन्याय पाहून वाल्मिक कराड ‘किस झाड की पत्ती’ असेच म्हणावे लागेल. पूर्वी मोहिते पाटलांवर कुणी काय बोलले की, विरोधकांना उचलून नेऊन मारले जायचे. जे प्रखर विरोध करतील त्यांना संपवायचे किंवा दमदाटी करून गांव सोडायला मजबूर करायचे इतका जनतेचा छळ मदमस्त सत्तेच्या धुंदीत वावरणाऱ्या मोहिते पाटलांनी केलाय. परवानाधारक व गावठी कट्टा असलेली पिस्तूल गॅंग तर मोहिते पाटलांकडे डझनाने असेल, पण त्यांच्या मूळापर्यंत कुणी जात नव्हते. खासदार धैर्यशील मोहिते पाटील यांच्यासोबत असणाऱ्या काही कार्यकर्त्यांकडे नेहमी पिस्तूल असते. पण त्यांच्याकडे परवान्याचे पिस्तूल असले तरी त्या कार्यकर्त्यांवर गुन्हे दाखल आहेत. मात्र राहुल रुपनवर व हरी पालवे यांच्यावर एकही गुन्हा दाखल नाही. मग खरी दहशत कुणाची आहे? गुन्हा दाखल असलेल्या गावगुंडांची की ज्यांच्यावर एकही गुन्हा दाखल नाही अशा राहुल रुपनवर व हरी पालवे यांची? रामभाऊ सातपुते यांनी किंवा त्यांच्या कार्यकर्त्यांनी सहा वर्षात कुठल्या तरी कार्यकर्त्यांना मारले आहे असा कधी प्रसंग घडला आहे का? त्यांचा लढा कामांच्या माध्यमातून व संविधानिक मार्गाने सुरू आहे. तरीही या दोघांचे फोटो रामभाऊ सातपुते यांच्याबरोबर व्हायरल करुन त्यांना माळशिरस तालुक्यातील वाल्मिक कराड म्हटले जात आहे. पण मोहिते पाटलांचा पूर्वेतिहास तपासा! त्यांनी अनेकांना संपवलंय, जेलमध्ये पाठवून कित्येकांचे आयुष्य उध्वस्त केलंय. मग खरी दहशत कुणाची? आज धैर्यशील मोहिते पाटील यांच्याकडे खासदारकी असली आणि रणजितसिंह मोहिते पाटील यांच्याकडे आमदारकी असली तरी त्यांची अवस्था बिनपगारी फूल अधिकारी अशी झाली आहे. तर केंद्रासह महाराष्ट्रात भाजपाची सत्ता असल्याने व जयकुमार गोरे यांची सोलापूर जिल्हा पालकमंत्री म्हणून नेमणूक केल्याने रामभाऊ सातपुते यांना चांगलेच बळ आले आहे. त्यामुळे मोहिते पाटील सैरभैर झाले असून राहुल रुपनवर व हरी पालवे यांचे पिस्तूलासह फोटो व्हायरल करुन रामभाऊ सातपुते यांना बदनाम करण्याचा घाट घातला जात आहे. मात्र पालकमंत्री जयकुमार गोरे यांनी अकलूजमध्ये पिस्तूल तपासणी मोहिम राबवली तर हे प्रकरण त्यांच्यावरच बूमरॅंग होऊन मोहिते पाटलांच्या कार्यकर्त्यांकडे परवान्यासह विना परवान्याचेही गावठी कट्टे सापडतील असे अकलूजमधील जनतेतून बोलले जात आहे.