माळशिरस तालुक्यातील पारंपरिक मोहिते पाटील विरोधकांतून चर्चा

ना. जयकुमार गोरे पालकमंत्री झाल्यानंतर रामभाऊ सातपुते यांनी शिंगणापूर ते दसूर पाटीपर्यंत त्यांच्या अभिनंदनाचे फ्लेक्स बोर्ड लावले. मात्र या फ्लेक्स बोर्डवर त्यांना भाजपातील इतर कार्यकर्ता का चालला नाही? तसेच ना. जयकुमार गोरे यांचा जिथे जिथे सत्कार करण्यात आला तिथे तिथे रामभाऊ सातपुते त्यांच्या पाठीशी दिसले. परंतु जिथून माळशिरस तालुक्यातील राजकारणाची दिशा ठरवली जाते त्या माळशिरस येथील भाजपाच्या कार्यालयात जेव्हा पालकमंत्री जयकुमार गोरे यांचा सत्कार करण्यात आला तेव्हा ते गाडीतून उतरले नाहीत. त्यामुळे यांना जुन्या भाजपा कार्यकर्त्यांचा द्वेष आहे की, के. के. पाटलांचा द्वेष आहे? असा प्रश्न उपस्थित करुन जुन्या भाजपाचे कार्यकर्ते गाडीत बसून राहिलेल्या रामभाऊ सातपुते यांच्याकडे हताशपणे बघत होते.

माळशिरस (बंडखोर वृत्तसेवा): मोहिते पाटलांच्या जीवावर सत्ता उपभोगायची, स्वतःचा स्वार्थ साधायचा आणि पुन्हा त्यांच्याविरोधात बोंबलायचे असा प्रकार सध्या माळशिरस तालुक्यात सुरू आहे. मात्र हे संधीसाधूपणाचे लक्षण असून ज्यांनी कधी शिवरत्नचा उंबरठा शिवला नाही अशा पारंपरिक मोहिते पाटील विरोधकांनाच त्यांच्यावर टीका करण्याचा नैतिक अधिकार आहे अशी चर्चा पारंपरिक मोहिते पाटील विरोधकांतून केली जात आहे.

देशासह महाराष्ट्रात महायुतीची सत्ता पुन्हा एकदा आल्यानंतर सत्तेची भीती दाखवून माजी आमदार रामभाऊ सातपुते सातत्याने मोहिते पाटलांना टार्गेट करीत आहेत. पण या रामभाऊ सातपुते यांना २०१९ ते २०२४ पर्यंत मोहिते पाटील कसे चालत होते? तेव्हा यांना सुमित्रा पतसंस्थेचे पीडित कर्जदार, ठेवीदार दिसले नाहीत का? सोलापूर डीसीसी बॅंकेत मोहिते पाटलांनी केलेला गैरव्यवहार दिसला नाही का? एकंदरीत जोपर्यंत मोहिते पाटील आपल्याला मदत करतायत तोपर्यंत ते यांना चांगलेच वाटले. मात्र जेव्हा मोहिते पाटलांनी यांना पराभवाची धूळ चारली तेव्हा अकलूजमध्ये विशेष लक्ष घालून रामभाऊ सातपुते यांनी भाजपाच्या शाखा काढत प्रत्येकवेळी मोहिते पाटलांना टार्गेट करण्यास सुरुवात केली आहे.‌ यावेळी मोहिते पाटलांच्या कृपाशीर्वादाने काहीजणांनी त्यांच्या विविध संस्थांचे लाभ घेतले. मोहिते पाटील सत्तेत असताना त्यांनी पोलिस स्टेशन ते जिल्हाधिकारी कार्यालयापर्यंतची अनेक कामे करून घेतली. तेव्हा आपल्या सोयीसाठी दादासाहेब, भैय्यासाहेब करणारेही आता मोहिते पाटलांवर टिका करत आहेत. वास्तविक पाहता रामभाऊ सातपुते हे आमदार असताना त्यांनी मनावर घेतले असते तर ते काहीही करु शकले असते. पण जेव्हा मोहिते पाटलांवर कारवाई करण्याची संधी होती तेव्हा रामभाऊ सातपुते यांनी सोलापूर डीसीसी बॅंक गैरव्यवहारप्रकरणी किंवा सुमित्रा पतसंस्थेच्या विरोधात तारांकित प्रश्न उपस्थित का केला नाही? आता स्वतः लोकप्रतिनिधी नसताना ते गारवाड कॉरिडॉर, एमआयडीसी, निरा देवधर पाणीप्रश्न आदी प्रश्न मार्गी लावल्याशिवाय स्वस्थ बसणार नाही असे म्हणत आहेत. पण ते जेव्हा आमदार होते तेव्हा हे प्रश्न सातपुतेंना का आठवले नाहीत? माळशिरस तालुक्यातील पश्चिम भाग हा पारंपरिक मोहिते पाटील विरोधक आहे. ज्या के. के. पाटलांनी आमदार करण्यासाठी रामभाऊ सातपुते यांना गावागावांत फिरवले ते के. के. पाटील पालकमंत्री जयकुमार गोरे यांचा सत्कार करताना रामभाऊ सातपुते गाडीतून खाली उतरले नाहीत यासारखे दुर्दैव काय? ॲड. सोमनाथ(आण्णा) वाघमोडे यांनी सुध्दा शिवरत्नचा उंबरठा कधी ओलांडला नाही. गेल्या अनेक वर्षांपासून मोहिते पाटील सत्तेत असतानाही ॲड. सोमनाथ(आण्णा) वाघमोडे यांनी त्यांना प्रखरपणे विरोध केला आहे. के. के. पाटील, ॲड. सोमनाथ(आण्णा) वाघमोडे, ॲड. संजीवनी पाटील, बाळासाहेब सरगर, बाळासाहेब वावरे, दादासाहेब उराडे, बबन पालवे, राहुल मदने यांच्याप्रमाणे हाताच्या बोटावर मोजता येतील इतकेच कट्टर मोहिते पाटील विरोधक आहेत. पण सध्या माळशिरस तालुक्यात आम्हीच एकमेव मोहिते पाटील विरोधक आहोत असा आव आणून रामभाऊ सातपुते व त्यांची संधीसाधू टीम मोहिते पाटलांना टार्गेट करीत आहे. पालकमंत्री जयकुमार गोरे यांच्या माळशिरस तालुक्यातील दौऱ्यावेळीही शासनाचे सगळे लाभ आपल्यालाच मिळावेत यासाठी पुढे पुढे करुन संधीसाधू सातपुतेंचं टोळकं मोहिते पाटलांवर तोफा डागत आहे. पण जनतेलाही कट्टर मोहिते पाटील विरोधक कोण आहे? हे चांगलेच ठाऊक आहे. रामभाऊ सातपुते यांचा मोहिते पाटील विरोध म्हणजे अळवावरच्या पाण्यासारखा आहे, तो कधी मावळेल हे सांगता येत नाही. पण आम्ही आतापर्यंत कट्टर मोहिते पाटील विरोधक होतो आणि अखेरच्या श्वासापर्यंत मोहिते पाटील विरोधकच राहणार असा सूर पारंपरिक मोहिते पाटील विरोधकांतून उमटत आहे.

पुढील अंकात वाचा:- जुनी भाजपा व नवीन भाजपातील धुसफुसीचा लवकरच उद्रेक होणार! मुख्यमंत्री देवेंद्र फडणवीसांना भेटून जुन्या भाजपाचे कार्यकर्ते पुढची दिशा ठरविणार असल्याचा खास रिपोर्ट…