अकलूज (बंडखोर वृत्तसेवा): संग्रामनगर, तालुका माळशिरस येथे टोळीयुद्धातील पूर्ववैमनस्यातून गोळीबार करून नाना दिलीप आसबे याचा खून केल्याप्रकरणी माळशिरस सत्र न्यायालयात मोक्का कायद्यानुसार आठ आरोपींविरुद्ध दाखल असलेल्या खटल्यामधील आरोपी नं. 3. रमेश विश्वनाथ धुळे वय 40 वर्षे, रा. माळशिरस यांचा दाखल केलेला जामीन अर्ज जिल्हा व सत्र न्यायालय माळशिरस न्यायालयाने दिनांक 16 जानेवरी 2025 रोजी मंजूर केला. ॲडव्होकेट संदीप दत्तात्रय मगर यांनी जिल्हा व सत्र न्यायालय माळशिरस न्यायालय येथे आरोपी नंबर 3 रमेश विश्वनाथ धुळे याचा जामीन अर्ज केला होता. सदरचा जामीन अर्ज माळशिरस जिल्हा व सत्र न्यायालयाने मंजूर केला. याप्रकरणी ॲडव्होकेट संदीप दत्तात्रय मगर यांनी काम पाहिले. ॲडव्होकेट संदीप दत्तात्रय मगर यांनी याआधी सर्वोच्च न्यायालयात यातील मुख्य आरोपी प्रदीप पांडुरंग माने याचा जामीन मंजूर करून आणला होता. त्या निकालाचा आधार घेत आवश्यक ते सर्व प्रयत्न करून रमेश धुळे याचा जामीन अर्ज मंजूर करून घेतला.
याबाबत हकीकत अशी की, दि.२९/१२/२०१६ रोजी सकाळी 10.15 वाजणेचे सुमारास फिर्यादी अनिकेत जालिंदर उंबरे व फिर्यादीचे नातेवाईक मामा नानासाहेब दिलीप आसबे असे दोघेजण अश्विनी हॉस्पिटल समोरील लोखंडी बाकड्यावर बसलेले होते, त्यावेळी दोन इसम हे त्यांचेजवळ आले व त्यापैकी एकाने पूर्व वैमनस्यातून नाना आसबे यांचेवर बंदुकीने गोळी झाडली. त्यामुळे नाना आसबे हे पळू लागले, त्याचवेळी त्या दोघांनी त्याचे हातातील दोन बंदुकीने नानाचे डोक्यात, उजवे हाताला गोळ्या झाडल्या. त्यामुळे नाना आसबे मोठ्या जखमा होऊन खाली पडला व त्या लोकांनी झाडलेल्या गोळीचे चरे फिर्यादीचे उजवे खांद्यावर व उजवे हाताचे कोपऱ्यावर लागून फिर्यादी जखमी झाला. त्यानंतर दोन्ही मारेकरी दुचाकीवरून निघून गेले. उपचारादरम्यान फिर्यादीचे मामा नानासाहेब आसबे हे मयत झाले अशा आशयाची फिर्याद पोलीस स्टेशनमध्ये दाखल करण्यात आली. तद्नंतर फिर्यादी हा त्याचे गावी असताना पोलिसांनी नानासाहेब आसबे यांच्यावर गोळीबार करणाऱ्या दोन इसमापैकी देवा जाधव याला अटक केली. त्याने प्रदीप पांडुरंग माने, रमेश विश्वनाथ धुळे, अतुल इंगळे, दशरथ विठोबा माने, राजू मधुकर भोसले, साजिद इब्राहिम सय्यद, सागर प्रताप मोहिते, सचिन दामोदर एखतपुरे यांनी संगनमत करून व कट रचून खून केल्याचे कबूल केले.
यात सरकार पक्षातर्फे युक्तिवाद करताना विशेष सरकारी वकील यांनी आरोपीवर बरेच गुन्हे दाखल आहेत असे म्हणत आरोपी पक्षाच्या विरोधात युक्तिवाद केला. तरी यात आरोपी रमेश विश्वनाथ धुळे यांच्या वकिलांनी गेल्या 7 वर्षेहून अधिक काळापासून कारागृहात असल्याने स्थानिक कोर्टात केस अद्याप चालू न केल्याचे तसेच 84 साक्षीदारापैकी एकही साक्षीदार तपासणी न झाल्याचे आणि चार्जदेखील नाही झाला असा युक्तिवाद केला आणि मुक्त करावे यासाठी जामीन अर्ज दाखल केलेला होता. तो युक्तिवाद ग्राह्य मानून न्यायालयाने रमेश विश्वनाथ धुळे याचा जामीन अर्ज मंजूर केला. यात आरोपीतर्फे ॲड. संदीप दत्तात्रय मगर यांनी काम पाहिले.