अकलूज (बंडखोर वृत्तसेवा): माझ्या २१ लाख रुपयांचे १ लाख रुपये व्याज व मुद्दल दोन दिवसांत दे म्हणून अल्ताफ मुल्ला यांना अजय तोरसकर याने शिवीगाळ करून त्यांना व त्यांच्या कुटुंबियांना जीवे मारण्याची धमकी दिल्यानंतर अल्ताफ मुल्ला यांनी औषध प्राशन केले. त्यामुळे राणे हॉस्पिटलमध्ये त्यांना उपचारासाठी दाखल केल्यानंतर त्यांच्या जबाबावरुन अजय तोरसकर, त्याचा भाचा प्रसाद, अनिल कोयले, बन्सीराम गोरे व नितीन गोरे यांचेवर अकलूज पोलिस स्टेशनमध्ये महाराष्ट्र सावकारी (नियमन) अधिनियम २०१४ अन्वये ३९, ४५ भारतीय न्याय संहिता २०२३ अन्वये ३५२, ३५१(२), ३५१(३), ३(५) नुसार गुन्हा दाखल झाला आहे.

याबाबत पोलिस सूत्रांकडून मिळालेल्या माहितीनुसार, अल्ताफ अब्दुल मुल्ला आपल्या कुटुंबासह घरी बसलेले असताना दुपारी २:३० वा. च्या सुमारास अजय विश्वासराव तोरसकर व त्याचा भाचा प्रसाद या दोघांनी स्विफ्ट गाडीत येऊन सहा वर्षांपूर्वी माझ्याकडून २१ लाख रुपये ५ टक्के व्याजाने घेतलेले कधी देणार म्हणून वाद घालायला सुरुवात केली. तेव्हा अल्ताफ मुल्ला यांची पत्नी रेश्मा त्यांना समजावून सांगत होती तरीही ते ऐकत नव्हते. त्यावेळी अल्ताफ मुल्ला यांनी आता माझ्याकडे पैसे नाहीत, तुम्ही वर्षभर थांबा तुमचे पैसे देतो असे म्हटले. तेव्हा अजय तोरसकर व त्याचा भाचा प्रसाद यांनी आम्हाला दोन दिवसांत पैसे नाही दिले तर तुम्हाला जीवंत ठेवणार नाही. तुमचा मुलगा अमीर याला पुण्यात जाऊन मारीन अशी धमकी देऊन शिवीगाळ केली व ते निघून गेले. तसेच चौंडेश्वरवाडी येथील अनिल कोयले याचेकडून दीड वर्षांपूर्वी अल्ताफ मुल्ला यांनी ८ लाख रुपये दरमहा ७ टक्के व्याजाने घेतले होते. हा सुध्दा सातत्याने त्यांच्या घरी जाऊन मुदत संपण्यापूर्वीच माझे पैसे कधी देणार म्हणून शिवीगाळ करून दमदाटी करीत असतो. माळशिरस येथील बन्सीराम गोरे व त्याचा मुलगा नितीन बन्शीराम गोरे यांचेकडून दोन वर्षांपूर्वी साडेसात लाख रुपये दरमहा ८ टक्के व्याजाने घेतले होते. त्यांचे पैसे देण्यास थोडा उशीर झाला तर दोघेही अल्ताफ मुल्ला यांच्या घरी जाऊन पैसे मागायचे व दिले नाहीत तर शिवीगाळ करून दमदाटी करून निघून जायचे. या सर्वांकडून होणाऱ्या वारंवार त्रासाला कंटाळून १४ जानेवारी २०२५ रोजी दुपारी ३:०० वा. च्या सुमारास अल्ताफ मुल्ला यांनी औषध प्राशन केले. याप्रकरणी संबंधित आरोपींवर महाराष्ट्र सावकारी (नियमन) अधिनियम २०१४ अन्वये ३९, ४५ भारतीय न्याय संहिता २०२३ अन्वये ३५२, ३५१(२), ३५१(३), ३(५) नुसार गुन्हा दाखल झाला असून पुढील तपास पोलीस निरीक्षक निंभोरे करीत आहेत. मात्र सदरचे आरोपींना अद्यापही अटक न केल्याने फिर्यादी दहशतीखाली असल्याचे त्यांच्या निकटवर्तीयांकडून समजते.