माळशिरस (बंडखोर वृत्तसेवा): विधानसभा निवडणुकीच्या पार्श्वभूमीवर पंचायत समितीचे उपसभापती किशोर सूळ यांनी उपमुख्यमंत्री देवेंद्र फडणवीस यांची भेट घेतल्यानंतर त्यांच्यामध्ये माळशिरस विधानसभा मतदारसंघाच्या निवडणुकीबाबत सकारात्मक चर्चा झाली असून प्रतिस्पर्ध्याला कडवी झुंज देण्यासाठी भाजपा पक्षश्रेष्ठी किशोर सूळ या विकसनशील नवीन चेहऱ्याला संधी देण्याची दाट शक्यता राजकीय जाणकारांतून वर्तवली जात आहे.
किशोर सूळ यांनी पंचायत समितीच्या माध्यमातून उपसभापती पदाच्या कार्यकाळात माळशिरस तालुक्यातील शेवटच्या घटकांपर्यंत पोहचून सर्वसामान्यांशी चांगली नाळ जोडली आहे. आपल्याला मिळालेल्या संधीचे सोने करुन त्यांनी अनेक गरजूंना विविध योजनांचा लाभ मिळवून दिला आहे. त्यामुळे त्यांच्याबद्दल जनमत चांगले असल्याचे दिसून येत आहे. गत लोकसभा निवडणुकीत किशोर सूळ व त्यांच्या समर्थकांनी भाजपाच्या उमेदवाराला मताधिक्य मिळवून देण्यासाठी दिवसरात्र एक केला आहे. उत्तम जानकर राष्ट्रवादी काँग्रेस शरद पवार गटात गेल्यानंतर पारंपरिक विरोधकांचीही मतं त्यांच्याबरोबर येतील असा आशावाद शरद पवारांना होता. मात्र किशोर सूळ व ॲड. सोमनाथ वाघमोडे यांनी भाजपाला माळशिरस तालुक्यातून जवळपास १५००० जादा मतं मिळवून दिली आहेत. एकीकडे उत्तम जानकर यांच्यासारख्या संधीसाधू नेत्याला राष्ट्रवादी शरद पवार गटाकडून उमेदवारी मिळणार असल्याची चर्चा असल्याने त्यांना कडवी झुंज देण्यासाठी भाजपाकडून कणखर व पारंपरिक मोहिते पाटील विरोधक असलेल्या धनगर समाजातील लोकांची मतविभागणी करण्यासाठी भाजपासमोर किशोर सूळ हा उत्तम पर्याय आहे. तसेच भाजपा पक्षश्रेष्ठींंची विश्वासार्हता जपून माळशिरस तालुक्यात भाजपाला मजबूत करण्याचे काम किशोर सूळ यांनी केले आहे. त्यामुळे कुणालाही न फसविणारे निष्कलंक व प्रामाणिक नेतृत्व असलेल्या किशोर सूळ यांना माळशिरस तालुक्यातून आमदारकीचे तिकीट मिळण्याची दाट शक्यता जनतेतून वर्तवली जात आहे.