भूषण कांबळेच्या दौऱ्यामुळे स्थानिक कार्यकर्त्यांतून संतापाची लाट

माळशिरस (बंडखोर वृत्तसेवा): माळशिरस विधानसभा मतदारसंघ एससीसाठी राखीव होऊन पंधरा वर्षे झाली, तरीही स्थानिक कार्यकर्त्यांना आमदारकीची संधी न मिळता या ठिकाणाहून प्रस्थापित पक्षांनी आयात उमेदवारांनाच आमदार केले. आता पाचपैकी दोनच टर्म राहिलेल्या असताना भाजपाकडून उस्मानाबाद येथील माजी खासदार शिवाजी कांबळे यांचे सूपुत्र भूषण कांबळे यांनी माळशिरस तालुक्यात दौरे सुरू केले आहेत. त्यामुळे स्थानिक कार्यकर्त्यांमध्ये संतापाची लाट पसरली असून माळशिरस विधानसभा मतदारसंघ बाहेरचे उमेदवार बोकांडी घेण्यासाठीच राखीव केला आहे का? असा संतप्त प्रश्न जनतेतून उपस्थित केला जात आहे.
ज्या ठिकाणी एससी समाजाची लोकसंख्या जास्त आहे त्या ठिकाणच्या कार्यकर्त्याला आमदार होण्याची संधी मिळावी म्हणून महाराष्ट्रात २९ विधानसभा मतदारसंघ राखीव केले आहेत. त्यापैकी माळशिरस विधानसभा हा मतदारसंघ आहे. मात्र या मतदारसंघात सलग तीन टर्म झाल्या तरीही स्थानिक कार्यकर्त्यांना आमदारकीची संधी न मिळता याठिकाणी चर्मकार या एकाच जातीला प्रस्थापित पक्षांनी आमदारकीची संधी दिली. पण या तिन्ही टर्मला कुणालच स्थानिक कार्यकर्त्याला आमदार करावेसे वाटले नाही. म्हणूनच यावेळी माळशिरस तालुक्यातील एससी समाज आक्रमक झाला असून यावेळी स्थानिक बौध्द किंवा मातंग समाजातील कार्यकर्त्याला आमदार करण्यासाठी एससी समाजाने कंबर कसली आहे. मात्र भाजपाकडून आपलीच उमेदवारी फायनल होणार आहे असे म्हणून उस्मानाबादचे माजी खासदार शिवाजी कांबळे यांचे सूपुत्र भूषण कांबळे यांनी माळशिरस तालुक्यात दौरे सुरू केले आहेत. शिवाजी कांबळे यांनी एप्रिल २०२४ मध्येच उबाठा शिवसेना पक्षात प्रवेश केला आहे. मग भूषण कांबळे भाजपाकडून कसे काय लढणार? भूषण कांबळे यांनी मनी पॉवरचा वापर करुन माळशिरस विधानसभा मतदारसंघातून आमदार होण्यासाठी धडपड सुरू केली आहे. मुंबई व पुणे याठिकाणी त्यांचे मोठमोठे उद्योग सुरू आहेत. त्यामुळे त्यांनी आपल्या उद्योगांवरच पूर्णपणे फोकस करावा. उगीच दुसऱ्याच्या ताटातले हिसकावून घेऊन पंगतीला बसू नये. माळशिरस विधानसभा मतदारसंघ स्थानिक कार्यकर्त्यांना आमदार करण्यासाठी राखीव झालेला आहे, बाहेरच्या उमेदवारांना बोकांडी घेण्यासाठी नव्हे! अशा प्रतिक्रिया स्थानिक कार्यकर्त्यांतून उमटत आहेत.