श्रीपूर (बंडखोर वृत्तसेवा): माढा विधानसभेचे बिगुल वाजले असून प्रत्येक पक्ष, संघटना, नेते माढ्यातून मीच आमदार होणार असे ठणकावून सांगत आहेत. गेली तीस वर्षे या तालुक्याचे नेतृत्व आमदार बबनराव शिंदे यांनी केले. ते आता वयोमानानुसार यावेळी निवडणूक लढणार नाहीत, तर त्यांचे पुत्र रणजीत शिंदे यांनी गुडघ्याला बाशिंग बांधले आहे व मीच या तालुक्याचा आमदार होणार या भोळ्याभाबड्या आशेने माळशिरस, पंढरपूर व माढा तालुक्यात वणवन उन्हातान्हामध्ये ते भटकत आहेत. मात्र तीनही तालुक्यातून त्यांना जनतेने साफ नाकारलेले आहे. त्यांच्या दौऱ्यामध्ये कुठेही प्रतिसाद जनतेने दिला नाही. त्यामुळे माढा आणि आमदार पुत्र पाडा अशी सडकून टीका रयत क्रांती संघटनेचे राज्य प्रवक्ते राहुल बिडवे यांनी केल्याने आता माढा विधानसभेची रंगत चांगलीच रंगणार आहे.
बबनराव शिंदे अनेक वर्षे आमदार आहेत. आता त्यांच्याच घरातून प्रतिस्पर्धी तयार होऊन रणांगणात उतरू पाहत आहेत. परंतु जनतेला आता घराणेशाहीचा कंटाळा आलेला आहे. तेच तेच चेहरे आणि त्यांचीच मुले त्यामुळे तरुण सुशिक्षित मतदार शिंदे परिवाराला कात्रजचा घाट दाखवल्याशिवाय राहणार नाही असे जनतेतून बोलले जात आहे. माढा तालुक्यात रस्ते, वीज, पाणी, सामान्य माणसाच्या हाताला काम मिळाले नाही. मात्र शिंदे परिवाराने साखर कारखाने व स्वतःचे कुटुंब मात्र डेव्हलप केले असा घणाघाती आरोप रयत क्रांती संघटनेचे राहुल बिडवे यांनी केला आहे.