माळशिरस तालुक्यातील लढाऊ कार्यकर्ते कुणाच्या जीवावर उड्या मारत नाहीत

माळशिरस (बंडखोर वृत्तसेवा): शिवरत्नचे काही पाळीव विरोधक असले तरी माळशिरस तालुक्यात प्रस्थापित मोहिते पाटलांच्या विरोधात प्रामाणिकपणे काम करणारे कट्टर विरोधक सुध्दा आहेत. ते फाटके असले तरी नेटके आहेत, मात्र मोहिते पाटलांच्या विरोधात राजकारण करणारे काही संधीसाधू विरोधक याच विरोधकांचा केवळ राजकारणासाठी वापर करीत असतात. परंतु कुणी आले काय, आणि गेले काय माळशिरस तालुक्यातील पारंपारिक मोहिते पाटील विरोधकांना काही फरक पडत नाही. कारण ते कुणाच्या जीवावर उड्या न मारता स्वबळावर छातीठोकपणे मोहिते पाटलांना विरोध करीत असतात. तरीही माजी खासदार रणजितसिंह नाईक निंबाळकर समर्थक माळशिरस तालुक्यातील विरोधक अडचणीच्या काळात आमच्याकडेच मदत मागतील या भ्रमात वावरत असले तरी त्यांनी या भ्रमातून बाहेर यावे असे माळशिरस तालुक्यातील कट्टर मोहिते पाटील विरोधकांतून बोलले जात आहे.

माजी खासदार रणजितसिंह नाईक निंबाळकर यांना खासदार होण्यापूर्वी कुणी ओळखतही नव्हते. २०१९ साली त्यांना भाजपाने उमेदवारी दिल्यामुळे मोहिते पाटलांसह माळशिरस तालुक्यातील मोहिते पाटील विरोधक उत्तम जानकर, डॉ. धवलसिंह मोहिते पाटील, रंजनभाऊ गिरमे व इतर मोहिते पाटील विरोधक मिळून सर्वांनी त्यांना खासदार केले. मात्र कालांतराने मोहिते पाटील व निंबाळकरांमध्ये बिनसले. दरम्यानच्या काळात पुलाखालून बरेच पाणी गेले असले तरी जेव्हा माजी खासदार रणजितसिंह नाईक निंबाळकर यांनी मोहिते पाटलांच्या विरोधात आक्रमक भूमिका घेतली व मोहिते पाटलांनी राष्ट्रवादी शरद पवार गटात प्रवेश केला तेव्हा माळशिरस तालुक्यातील पारंपारिक मोहिते पाटील विरोधक ठामपणे रणजितसिंह नाईक निंबाळकर यांच्या पाठीशी उभे राहिले. कारण मोहिते पाटलांचा विरोधक तो आपला माणूस हे सूत्रच माळशिरस तालुक्याचे आहे. मात्र जो मोहिते पाटील विरोधक तो आपला मसिहा असा चुकूनही माळशिरस तालुक्यातील विरोधक विचार करीत नाहीत. कारण त्यांच्यात विरोध करायची व निस्तरायची धमक आहे. रणजितसिंह नाईक निंबाळकरांनी माळशिरस तालुक्यातील अनेक गुन्ह्यात अडकलेल्या मोहिते पाटील विरोधक कार्यकर्त्यांचा आश्वासनाचे गाजर दाखवून केवळ वापरच केला. मात्र आता ते कार्यकर्ते आपल्या अडचणीच्या काळात त्यांना फोन करतात तेव्हा त्यांचे फोन घेतले जात नाहीत. ते ऐनकेन प्रकारे अडचणींवर मात करतील. पण त्यांना धीर देण्याचे जे नाटक केले ते मतलबापुरते होते. वास्तविक पाहता मोहिते पाटील विरोधक असलेले उत्तम जानकरांनी आमदारकीच्या आशेवर मोहिते पाटलांना पाठिंबा दिला तरीही पारंपारिक मोहिते पाटील विरोधक असलेले त्यांच्यासोबत गेले नाहीत. त्यांनी रणजितसिंह नाईक निंबाळकर यांना साथ दिली. पण आपल्या पराभवानंतर निंबाळकरांनी माळशिरस तालुक्याकडे पाठ फिरवली असली तरी इथले विरोधक मोठ्या हिंमतीने प्रस्थापित मोहिते पाटलांशी लढतच राहतील. कारण माळशिरस तालुक्यातील लढाऊ कार्यकर्ते कुणाच्या जीवावर उड्या मारत नाहीत. पण तरीही माजी खासदार रणजितसिंह नाईक निंबाळकर समर्थक म्हणतात की, इथले कुणी आमच्याविरोधात गेले तर आम्ही त्यांना मदत करणार नाही. दरम्यान इथल्या कुणालाही त्यांच्या ताकदीची गरज नाही, ते लढण्यासाठी खंबीर आहेत, कारण माळशिरस तालुक्यातील कार्यकर्ते हे डरपोक नाहीत, तर लढवय्ये आहेत हे निंबाळकर समर्थकांनी लक्षात ठेवावे असे माळशिरस तालुक्यातील कट्टर मोहिते पाटील विरोधकांतून बोलले जात आहे.