अकलूज (बंडखोर वृत्तसेवा): काही महिन्यांपूर्वी स्थानिक कार्यकर्त्यांचे वाढदिवस साजरे केल्यामुळे वादात सापडलेल्या पोलिस कर्मचारी निकम यांची अकलूजहून बदली करण्यात आली होती. मात्र काही कालावधी गेल्यानंतर निकम यांना अकलूज पोलिस स्टेशनला पुन्हा रुजू करून त्यांच्याकडे अकलूजमधील वसूली सोपविल्याने पोलिस कर्मचारी निंभोरे यांचेकडून निकम यांचे इतके लाड कशासाठी? असा प्रश्न अकलूजकरांतून उपस्थित केला जात आहे.

पोलिस कर्मचारी सुहास क्षीरसागर यांची अकलूजहून बदली झाल्यानंतर त्यांच्या ठिकाणी वसूलीसाठी निकम यांची नियुक्ती करण्यात आली आहे. मात्र निकम यांचा पूर्वेतिहास पाहिला तर अकलूजमध्ये जवळजवळ ते वीस वर्षे नोकरी करतात असे म्हटले तरी वावगे ठरणार नाही. कारण अकलूज पोलिस स्टेशनला दहा वर्षे काम केल्यानंतर ते माळशिरसला गेले, त्यानंतर पुन्हा अकलूजला आले. तिथून मध्यंतरीच्या त्यांच्या कारनाम्याने निकम यांची वेळापूरात बदली झाली, तिथून पुन्हा फिरून ते अकलूजला रुजू झाले. वास्तविक पाहता एका ठिकाणी चार्ज घेतल्यानंतर पुन्हा त्याठिकाणी ड्युटी करू नये असा शासनाचा नियम आहे. परंतु या नियमाला धाब्यावर बसवून काही राजकीय नेत्यांच्या कृपाशिर्वादाने निकम पुन्हा अकलूजला रुजू झाले. संगम, वाफेगांव, जांभुड याठिकाणाहून बेसुमार वाळू उपसा सुरू आहे, अकलूज परिसरात ऑनलाईन चक्री मटक्यामुळे कॉलेजमधील तरूण उध्वस्त होऊ लागले आहेत. तसेच पाटीलवस्ती येथील आण्णा घुले हा अकलूजमधील सर्वात मोठा गुटखा माफिया असून माळशिरस तालुक्यात तो सगळीकडे गुटखा पुरवतो. यामाध्यमातून कोट्यवधी रुपयांची उलाढाल सुरू असून या अवैध गुटखा विक्रीला निकम यांचा वरदहस्त आहे. त्यांच्याकडे अवैध गुटख्यांची विक्री करण्यासाठी दररोज दोन पिकअप येतात. त्यामुळे या सर्व अवैध धंद्यांतून पोलिस कर्मचारी निकम वसूली करीत असल्याने या सर्व धंद्यांची वरिष्ठांकडून चौकशी करण्यात यावी. या अवैध धंद्यांच्या माध्यमातून निकम यांच्यावर मोठ्या प्रमाणात धन’लक्ष्मी’चा वर्षाव होताना दिसत आहे. अकलूज म्हणजे सोन्याची अंडी देणारी कोंबडी असल्याने याठिकाणी वर्णी लावण्यासाठी अनेकजण धडपड करताना दिसतात. मोहिते पाटलांच्या कृपाशिर्वादाने अकलूज परिसरात त्यांच्या कार्यकर्त्यांचे सुरू असलेल्या अवैध धंद्यांना संरक्षण देण्याचे काम निकम करीत आहेत. त्यामुळेच निकम यांना पुन्हा अकलूजला घेऊन त्यांच्याकडे वसुलीचे काम सोपवले आहे. मात्र वादग्रस्त पोलिस कर्मचारी निकम यांचे इतके लाड स्वाभिमानी कार्यकर्त्यांना त्रासदायक ठरण्याची शक्यता असल्याने पोलिस कर्मचारी निकम यांचेकडून पोलिस निरीक्षक निंभोरे यांनी चार्ज काढून घ्यावा व त्यांची इतर ठिकाणी बदली करण्यासाठी प्रयत्न करावेत असे अकलूजकरांतून बोलले जात आहे. (क्रमशः)