माळशिरस तहसील कार्यालयाचा अजब कारभार !!

माळशिरस (बंडखोर वृत्तसेवा): मौजे नातेपुते येथील जमीन गट नं.546/4 या मिळकतीचे मालक तानाजी भिमराव ढोबळे हे गेल्या 15 वर्षापासून परागंदा असताना व त्यांची आत्या हौसाबाई सावळा ऐवळे ही सन 1984 साली मयत असताना परांगदा असलेले तानाजी ढोबळे व मयत असलेली हौसाबाई ऐवळे यांचे ऐवजी बनावट लोक उभे करुन महसूल अधिकारी यांचेशी हातमिळवणी करुन ऋषिकेश तानाजी ढोबळे आणि इतर लोकांनी जमीन हडपल्याबाबतची तक्रार बाळु जगन्नाथ जाधव, रा.नातेपुते यांनी जिल्हाधिकारी व पोलिस प्रशासनाकडे केली आहे. याबाबत सविस्तर माहिती अशी की, दि.21/09/2020 ते 24/09/2020 या कालावधीमध्ये मौजे माळशिरस आणि मौजे नातेपुते येथे तत्कालीन महसुल अधिकारी तलाठी श्री.प्रभाकर उन्हाळे, मंडल अधिकारी श्री.संदिप चव्हाण व तत्कालीन तहसिलदार श्री.अभिजीत पाटील यांचेशी संगनमत व हातमिळवणी करुन ऋषिकेश तानाजी ढोबळे यांनी त्यांचे वडील तानाजी भिमराव ढोबळे हे गेल्या 15 वर्षापासुन परागंदा असताना नक्की कुठे आहेत याचा काहीएक थांगपत्ता कोणालाही नसताना, तसेच वडिलांची आत्या हौसाबाई सावळा ऐवळे रा.माळशिरस या दि.29/12/1984 रोजी मयत झाल्या असताना तक्रार अर्जदार बाळु जगन्नाथ जाधव यांचा जमिनीमधील हक्क डावलण्याच्या व हडपण्याच्या वाईट उद्देशाने परागंदा असलेले तानाजी ढोबळे व सन 1984 साली मयत झालेल्या हौसाबाई ऐवळे यांचेऐवजी बनावट व्यक्ती उभा करुन महसुली अधिकाऱ्यांना हाताशी धरुन खोटी व बनावट कागदपत्र तयार करुन सदर जमीन ऋषिकेश ढोबळे याचे नावे वाटपाने करुन घेतली असल्याने संबंधित लोकांविरुध्द भा.दं.वि.कलम 417, 420, 464, 166, 167 प्रमाणे गुन्हा दाखल करावा अशी तक्रार बाळु जगन्नाथ जाधव यांनी पोलिस प्रशासनाकडे दिली आहे. माळशिरस तहसील कार्यालयामध्ये जिवंत व्यक्तींची कामे, दाखले वेळेवर मिळत नसताना मयत असलेल्या व परागंदा असलेल्या लोकांचे जमीनीचे वाटप मात्र होत असल्याने सदर घटनेबाबत माळशिरस तालुक्यातून आश्चर्य व्यक्त होत आहे