माळशिरस (बंडखोर वृत्तसेवा): मोहिते पाटलांचे कट्टर विरोधक म्हणून काम करीत असताना उत्तम जानकरांना गरूड बंगल्यावर उभी सभा घ्यावी लागत होती. मात्र आता गरूडने मोहिते पाटलांशी हातमिळवणी केल्यानंतर त्यांच्याकडे मोजकेच कार्यकर्ते असल्याने जानकरांना गरुड बंगल्यासमोर आडवी सभा घ्यावी लागत आहे.‌ यावरुनच माढ्यात तुतारीतून आवाजच येणार नाही अशी परिस्थिती आहे असे वक्तव्य मनसे विधानसभा अध्यक्ष कुंडलिकराजे मगर यांनी केले.

उत्तम जानकर यांनी धैर्यशील मोहिते पाटील यांच्या प्रचारासाठी गरुड बंगल्यावर आयोजित केलेल्या बैठकीतील संख्या पाहून कट्टर मोहिते पाटील विरोधक कुंडलिकराजे मगर यांनी साप्ताहिक बंडखोरशी बोलताना आपले मत व्यक्त केले. यावेळी पुढे बोलताना ते म्हणाले की, गेल्या विधानसभा निवडणुकीत एक लाख दोन हजार मतं घेतलेले उत्तम जानकर मोहिते पाटलांच्या दावणीला गेल्यानंतर लोकांनी गरुड बंगल्याकडे पाठ फिरवली आहे. पूर्वी गरुड बंगल्यासमोर लोकांना बसायला जागा नव्हती. पण उत्तम जानकरांनी लोकसभा निवडणुकीत मोहिते पाटलांसोबत हातमिळवणी केल्यानंतर लोकांनी त्यांची साथ सोडली आहे. एका वेळेस विरोधकाच्या व्यासपीठावर बसायला 50 खुर्च्या लागायच्या. आता किती खुर्च्या मांडल्यात हे पाहून अभ्यास करून लोकांनी मतदान करावे. आपल्या वैयक्तिक स्वार्थासाठी सहकाऱ्यांशी गद्दारी करुन मांडवलीचे राजकारण करणारा उत्तम जानकर संपलेला माणूस विधानसभेला काय चालणार? स्वाभिमानी माळशिरस तालुका कधीही मोहिते पाटलांचे समर्थन करणार नाही. आम्ही कट्टर विरोधक म्हणूनच मोहिते पाटलांच्या विरोधात तालुक्यात काम करणार असे मत मनसेचे नेते कुंडलिक राजे मगर यांनी व्यक्त केले. यावेळी सुरेशभाऊ टेळे, आप्पासाहेब कर्चे, सुरेश वाघमोडे, लक्ष्मण नरोटे, बाबा ननवरे, रोहित खाडे, मंगलताई चव्हाण, पैलवान महावीर मगर, फिरोज मुलाणी आदी मान्यवर उपस्थित होते.