अकलूज (बंडखोर वृत्तसेवा): नुकतीच अकलूज येथील क्रीडा संकुलवर धैर्यशील मोहिते पाटील यांच्या प्रचारार्थ शरद पवारांची सभा झाली. मात्र ही सभा फेल जाऊ नये म्हणून जयसिंह मोहिते पाटील यांनी अकलूजमधील गाळेधारकांना धमकावून शरद पवारांच्या सभेला बोलावल्याची जोरदार चर्चा सुरू आहे.

मोहिते पाटलांचे राजकारण हे संस्थेतील कर्मचाऱ्यांच्या व गाळेधारकांच्या भरवशावरच चालते. त्यामुळे कुठल्याही राजकीय कार्यक्रमात ते अकलूजमधील गाळेधारकांना व कर्मचाऱ्यांना येण्याची सक्ती करतात. कारखान्यातील एक कामगार धैर्यशील यांच्या प्रचारासाठी आला नाही म्हणून त्याला कामावरुन काढून टाकण्यात आल्याचे समजते. तर अकलूज येथील वाड्यात गाळेधारकांना सक्तीने बैठकीला बोलावल्याने अनेक गाळेधारकांतून तीव्र नाराजी व्यक्त केली जात आहे. वास्तविक पाहता गाळेधारक नियमानुसार जितके डिपॉझिट असेल तितके डिपॉझिट ते देत असतात. तसेच महिन्याला ठरल्याप्रमाणे भाडेही देत असतात. त्यांचे भाडे थकीत राहिले तर गाळे खाली करण्याची नोटीस अथवा त्या भाड्याला नगरपरिषदेच्या नियमानुसार व्याजही आकारतात. दरम्यान अकलूजची बाजारपेठ ही पूर्वीसारखी राहिली नाही, ती ओस पडलेली आहे. त्यामुळे व्यावसायिकांचे धंदे बसले आहेत. त्यामुळे आपला घरप्रपंच चालविताना त्यांच्या नाकीनऊ येत आहे. अशा परिस्थितीत मोहिते पाटलांनी गाळेधारकांना सक्तीने शरद पवारांच्या सभेला बोलाविल्याने त्यांच्यातून तीव्र नाराजी व्यक्त केली जात आहे. वास्तविक पाहता धैर्यशील मोहिते पाटील यांना तुतारीकडून उमेदवारी मिळाल्यामुळे अकलूजकरांसह माळशिरस तालुक्याला ही उमेदवारी खटकत आहे. त्यामुळे शरद पवारांना हवा तसा प्रतिसाद मिळत नाही. आपल्याला होत असलेला प्रचंड विरोध पाहून शरद पवारांची सभा फेल जातेय की काय? या टेन्शनमध्ये असलेल्या जयसिंह मोहिते पाटील यांनी अकलूजमधील गाळेधारकांना दम देऊन सभेला बोलावले. त्यामुळे गाळेधारकांमध्ये नाराजीचा सूर असून धैर्यशील यांना सुप्त नाराजीचा फटका बसण्याची दाट शक्यता राजकीय जाणकारांतून वर्तविली जात आहे.