इन्कम टॅक्सची धाड पडण्याची दाट शक्यता

अकलूज (बंडखोर वृत्तसेवा): वैद्यकीय क्षेत्राचे माहेरघर म्हणून अकलूजची सर्वत्र ओळख आहे. अशा या अकलूज शहरातील नामांकित डॉक्टरांवर दबावतंत्राचा, दमनशाहीचा वापर करून भाजपाच्या विरोधात लढण्यासाठी अकलूजकरांनी त्यांच्याकडून कोट्यवधी रुपयांची वसुली सुरू केल्याने अकलूजमधील डॉक्टरांवर इन्कमटॅक्सची धाड पडण्याची दाट शक्यता असल्याचे बोलले जात आहे.

सत्ता ही स्वहितासाठी न राबविता जनतेच्या विकासासाठी, कल्याणासाठी राबविली पाहिजे. मात्र अकलूजमध्ये सत्तेच्या दमनशाहीतून, दडपशाहीतून डॉक्टरही सुटले नाहीत. यापूर्वी मोठमोठे उपक्रम असल्यावर अकलूजमधील डॉक्टरांकडून व अवैध धंदेवाल्यांकडून स्थानिक सत्ताधाऱ्यांनी वसुली केल्याचे ऐकले होते. पण त्याबद्दल कुणी नाराजी व्यक्त केली नव्हती. मात्र आता निवडणुकीसाठी एका नामांकित डॉक्टरांकडून पाच कोटी व इतर काही डॉक्टरांकडून २०-२० लाख रुपये घेतल्याचे खात्रीशीर सूत्रांकडून समजतंय. सदरचा निधी भाजपाच्या विरोधात प्रचारयंत्रणा राबविण्यासाठी वसूल केल्याचे स्थानिक सत्ताधाऱ्यांच्या निकटवर्तीयांतून बोलले जात आहे. दरम्यान ही रक्कम थोडी नाही, त्यामुळे अनेक डॉक्टर दहशतीखाली वावरत असून नाईलाजास्तव त्यांना तेवढी रक्कम देणे भाग पडत आहे. एका डॉक्टरने नाव न सांगण्याच्या अटीवर आमच्याजवळ मन मोकळे केले असून काही डॉक्टर प्रचंड तणावाखाली वावरत असल्याचे समजते. अनेक डॉक्टर हे स्थानिक सत्ताधाऱ्यांच्या कृपाशीर्वादाने अकलूजमध्ये आपला व्यवसाय वाढवत असल्याने त्यांना तोंड दाबून बुक्क्यांचा मार सहन करावा लागत आहे. एकंदरीत राजाने मारले, आणि पावसाने झोडपले तर दाद कुणाकडे मागणार? अशी काही डॉक्टरांची अवस्था झाली आहे. दरम्यान सदरचे डॉक्टर लाखो, कोटी रूपये स्थानिक नेत्यांना देत असल्याची कुणकुण इन्कमटॅक्स अधिकाऱ्यांना लागल्याने अकलूजमधील काही हॉस्पिटलवर कधीही धाड पडण्याची शक्यता वर्तवली जात आहे.