२००९ साली पंढरपूर विधानसभा मतदारसंघातून माजी उपमुख्यमंत्री विजयसिंह मोहिते पाटील यांचा पराभव झाल्यानंतर मोहिते पाटलांना शह देण्यासाठी उपमुख्यमंत्री अजित पवारांनी आमदार संजय शिंदे व प्रशांत परिचारक यांच्या माध्यमातून उत्तम जानकर यांना ताकद दिली. यादरम्यान संधीसाधू उत्तम जानकरांनी मोहिते पाटील हे विरोधकांचा ऊस जाणीवपूर्वक घेऊन जात नसल्याने त्याच्या पुंगळ्या होतायत. त्यामुळे प्रस्थापित मोहिते पाटलांच्या विरोधात लढण्यासाठी विरोधकांचाही साखर कारखाना व्हायला हवा असे म्हणून चांदापूरी येथे अर्धवट असलेला विरोधकांचा साखर कारखाना सुरु करण्यासाठी मोहिते पाटलांचे कट्टर विरोधक संजय शिंदे व प्रशांत परिचारक यांचेकडून त्यांनी मदत घेतली. तसेच भोळ्याभाबड्या मोहिते पाटील विरोधकांनीही उत्तम जानकर यांना आपल्या जमिनी देऊन कर्ज काढून मोठ्या प्रमाणात आर्थिक रसदही पुरवली. मात्र हा कारखाना सुरू झाल्यानंतर काही वर्षांतच वेळापूरात उत्तम जानकरांनी हवेली बांधून तिला गरूड नाव दिले. पण संधीसाधू डबल ढोलकी उत्तम जानकरांनी आपल्या हवेलीला गरुड असे नाव दिले असले तरी त्यांचे मांडवलीचे राजकारण पाहता उत्तम जानकर गरूड नव्हे तर रंग बदलणारे फरुड आहेत असेच म्हणावे लागेल.

उत्तम जानकर यांच्या मोहिते पाटलांशी झालेल्या युतीचे समर्थन करताना त्यांचे समर्थक म्हणतात की, राजकारणात असे निर्णय घ्यावे लागतात. पण ज्या विश्वासाने अत्याचारपीडित लोक जानकरांना आपला पाठीराखा समजतात त्यांचे काय? उत्तम जानकरांचे लोक म्हणून मोहिते पाटलांनी त्यांना वेगवेगळ्या प्रकारे अडचणीत आणून आयुष्य उध्वस्त केले. माढा लोकसभेचे उमेदवार धैर्यशील मोहिते पाटील यांनी आपल्या कार्यकर्त्यांमार्फत विरोधक कार्यकर्त्यांना मारहाण करुन गाव सोडायला भाग पाडले. मोहिते पाटलांच्या अत्याचाराचे बळी ठरलेल्या कार्यकर्त्यांनी उत्तम जानकरांना आपला मसीहा मानले. पण जे लोक आशाळभूत नजरेने जानकरांकडे पाहतात त्यांच्याच दुःखाचे भांडवल करून उत्तम जानकरांनी मांडवलीचे राजकारण केले. राहुल ढेरे हे धैर्यशील मोहिते पाटील यांच्या अन्यायाचे बळी ठरलेले आहेत. त्यामुळे ते त्यांच्याविरोधात फेसबुकवर पोस्ट टाकून जनतेसमोर सत्य वस्तुस्थिती मांडत असताना उत्तम जानकरांनी ढेरे यांना फोन करून धैर्यशील यांच्या विरोधात पोस्ट टाकू नको असे म्हटले. तेव्हा राहुल ढेरे यांना धक्काच बसला. मोहिते पाटील यांचे कट्टर विरोधक म्हणून आम्ही काही वर्षांपूर्वी सुमित्रा पतसंस्थेतील गैरकारभार चव्हाट्यावर आणल्यानंतर उत्तम जानकरांनी माजी न्यायाधीश बी. जी. कोळसे पाटील यांना घेऊन मोर्चा काढण्याचा इशारा दिला. याबाबतची पत्रके आम्ही स्वतः वाटली. मात्र ऐनवेळी मोर्चा रद्द करुन सुमित्रा पतसंस्थेचे पीडित असलेल्या लोकांना दगा दिला. यात खूपच मोठी डिल झाल्याचे मोहिते पाटील घराण्यातीलच एका व्यक्तीने आम्हाला सांगितले. त्यावेळी संधीसाधू उत्तम जानकर यांच्याबद्दल लोकांतून तीव्र नाराजी व्यक्त करण्यात आली होती. पण पोलिस प्रशासनाने परवानगी नाकारल्याचे कारण देत जानकरांनी तेव्हा वेळ मारुन नेली होती. वास्तविक पाहता सत्ताधाऱ्यांच्या विरोधात सातत्याने लढून जनतेच्या न्यायहक्कासाठी झगडणाराच खरा विरोधक असतो. आणि जेव्हा सत्ताधाऱ्यांचे अस्तित्व संपत चाललेले असताना जो ऐनवेळी आपल्या समर्थकांना थापा मारुन त्यांना साथ देतो तेव्हा अशा विरोधकांना सत्ताधाऱ्यांनीच पाळलेले असते हे सांगायला कुण्या ज्योतिषाची गरज लागत नाही. मोहिते पाटलांच्या विरोधात उपमुख्यमंत्री अजित पवारांनी जानकरांना मोठे केले, त्याच अजित पवारांना राष्ट्रवादीतून काढेन असे त्यांनी बालिश वक्तव्य केल्याने बाळदादांच्या नादी लागून जानकरांच्या डोक्यावर तर परिणाम झाला नाही ना असे लोकांना वाटू लागले. स्वतःला कट्टर मोहिते पाटील विरोधक म्हणून मिरवत खासदार रणजितसिंह नाईक निंबाळकर व माण-खटावचे आमदार जयकुमार गोरे यांचे दोस्त म्हणून वावरणाऱ्या उत्तम जानकरांनी ऐनवेळी त्यांच्या पाठीत खंजीर का खुपसला? मोहिते पाटलांशी समझोता करताना पारंपरिक मोहिते पाटील विरोधक असलेल्या ऍड. सुभाष पाटील, रंजनभाऊ गिरमे, फत्तेसिंह माने पाटील, ऍड. सोमनाथ वाघमोडे, किशोर सूळ यांच्यासह आपल्याला मसिहा मानणाऱ्या लोकांच्या मनाचा यांनी विचार का केला नाही? गत विधानसभा निवडणुकीत उत्तम जानकरांना पडलेली एक लाख मतं मोहिते पाटील विरोधक म्हणून पडली होती. जानकरांना वैयक्तिक पडली नव्हती. मग ही मतं आता आपल्या मागे राहतील याचा जानकरांनी विचारही करु नये. मोहिते पाटलांना मदत केल्यावर जानकरांना पुढची आमदारकी आपल्याला मिळेल असे वाटत असेल, पण या जातचोराला आणि फरुडासारखे रंग बदलणाऱ्या दगाबाज जानकरांना माळशिरस तालुक्यातील जनता कधीही डोक्यावर घेणार नाही हे मात्र निश्चित!