तुतारी वाजणारच नाही, फक्त डोमकावळे ओळखा

माळशिरस (बंडखोर वृत्तसेवा): एकाधिकारशाही व सूडबुद्धीचे राजकारण करणाऱ्या मोहिते पाटलांच्या विरोधात बोलले की लोक त्यांना डोक्यावर घेतात. मोहिते पाटलांना विरोध हेच भांडवल करुन उत्तम जानकर यांनी पारंपरिक मोहिते पाटलांच्या विरोधकांची मदत घेऊन शेतकरी साखर कारखाना सुरु केला. मात्र काही वर्षांतच वेळापूरात गरुड बंगला बांधला आणि तो कारखाना बंद झाला. अशाप्रकारे नकली विरोधकाचा मुखवटा धारण करून आपल्या सहकाऱ्यांची फसवणूक करणाऱ्या उत्तम जानकरांनी राजकीय अस्तित्व संपुष्टात येणाऱ्या मोहिते पाटलांशी मांडवलीचे राजकारण करुन हातमिळवणी केली आहे. त्यामुळे या संधीसाधू उत्तम जानकर व मोहिते पाटलांच्या विरोधात माळशिरस तालुक्यातील कट्टर विरोधक एकवटल्याने माढ्यात तुतारी वाजणारच नाही, मात्र माळशिरस तालुक्यातील पारंपरिक विरोधकांनी डोमकावळ्यांना ओळखले पाहिजे असा सूर कट्टर मोहिते पाटील विरोधकांतून निघत आहे.

१९ एप्रिलला संधीसाधू उत्तम जानकरांनी वेळापूरात खुनशी, कटकारस्थानी जयसिंह मोहिते पाटील व राष्ट्रवादी काँग्रेस शरद पवार गट माढा लोकसभा मतदारसंघाचे उमेदवार धैर्यशील मोहिते पाटील यांना बोलावून त्यांच्याशी मांडवलीचे राजकारण करुन समझोता केला. यावेळी उत्तम जानकरांनी गेल्या सहा महिन्यांपूर्वीच आमचं ठरलं होतं असं वक्तव्य केलं. मग मोहिते पाटील व उत्तम जानकर यांचं सहा महिन्यांपूर्वीच ठरलेलं असताना ते उपमुख्यमंत्री देवेंद्र फडणवीस यांनी पाठविलेल्या विशेष विमानाने त्यांच्याशी चर्चा करण्यासाठी का गेले? आणि चर्चा झाल्यानंतर आमचे अनेक वर्षांपासूनचे प्रश्न मिटले म्हणून प्रसारमाध्यमांसमोर प्रतिक्रिया का दिली? खासदार रणजितसिंह नाईक निंबाळकर, आमदार जयकुमार गोरे व उत्तम जानकर यांचा दोस्ताना पाहून १९ तारखेला ते निंबाळकर यांनाच पाठिंबा देतील असे सर्व मोहिते पाटील विरोधकांना वाटत होते. मात्र ऐनवेळी या संधीसाधू जानकर यांनी जयसिंह व धैर्यशील यांना वेळापूरात बोलावून त्यांना पाठिंबा दिल्याने सर्व विरोधकांना जबरदस्त धक्का बसला. त्यामुळे ऍड. सोमनाथ वाघमोडे व किशोर सूळ यांनी उत्तम जानकर व मोहिते पाटील यांच्या युतीबद्दल जनमत जाणून घेण्यासाठी खुडूस येथे सर्व विरोधकांची बैठक बोलावली. वास्तविक पाहता खासदार रणजितसिंह नाईक निंबाळकर व मोहिते पाटील यांच्यामध्ये वितुष्ट येण्याचे कारण जानकर हेच आहेत. खासदारांनी जानकरांना ताकद देऊ नये हेच मोहिते पाटलांचे म्हणणे होते. मात्र कुणाचेही न ऐकता ज्यांनी आपल्याला मदत केलीय त्यांना ताकद देण्याची भूमिका खासदार रणजितसिंह नाईक निंबाळकर यांनी घेतली. पण खासदारांची मदत घेऊन जानकरांनी त्यांच्याच पाठीत खंजीर खुपसण्याची भूमिका घेतली. गेल्या विधानसभा निवडणुकीत उत्तम जानकरांना एक लाख मतं मिळाल्यामुळे त्यांच्या डोक्यात हवा गेली असेल. आपण मोहिते पाटलांशी जुळवून घेतल्यानंतर आपल्या पाठीशी असलेले सर्वजण मागे येतील या भ्रमात ते होते. परंतु पारंपरिक मोहिते पाटील विरोधकांनी खुडूस येथे बैठक घेऊन संधीसाधू उत्तम जानकर व मोहिते पाटील युतीसंदर्भात जनमत जाणून घेतले. या जनमतानंतर विरोधक लवकरच आपली भूमिका जाहीर करणार आहेत. उत्तम जानकर मोहिते पाटलांकडे गेल्यामुळे मतांवर पडणारा फरक सर्व विरोधक योग्य रणनीती आखून भरुन काढणार आहेत. सदरच्या बैठकीला सर्व विरोधक प्रामाणिकपणे एकवटलेले असले तरी संधीसाधू डोमकावळेही साजूकपणाचा आव आणून तेथे उपस्थित होते. त्यामुळे सर्व विरोधकांच्या एकजुटीमुळे तुतारी तर वाजणारच नाही, पण संधीसाधू डबल ढोलकी डोमकावळ्यांना ओळखून पारंपरिक मोहिते पाटील विरोधकांनी योग्य रणनीती आखावी, कट्टर मोहिते पाटील विरोधक व मोहिते पाटलांच्या दमनशाहीचे बळी ठरलेले लोक कमळ फुलविण्यासाठी कधीही विरोधकांसोबतच राहतील असे जनतेतून बोलले जात आहे.