सोमनाथ हुलगे मारहाण प्रकरण

अकलूज (बंडखोर वृत्तसेवा) शिवसैनिक सोमनाथ हुलगे यांना गेल्या दोन वर्षांपूर्वी धैर्यशील मोहिते पाटील यांनी विजय नागरी पतसंस्थेच्या थकीत कर्जप्रकरणी मारहाण करून डोक्याला रिव्हॉल्व्हर लावला होता. तेव्हा सोमनाथ हुलगे यांनी अकलूज पोलिस स्टेशनला त्यांच्या विरोधात ३३७, ३२३, ५०४, ५०६, ३४ व आर्म ॲक्टनुसार ३, २५ या कलमाअंतर्गत गुन्हा दाखल केला होता. मात्र धैर्यशील यांच्यावर ३०७ प्रमाणे गुन्हा दाखल होऊ नये म्हणून अकलूज पोलिसांनी धैर्यशील मोहिते पाटील यांना वाचविण्यासाठी या गुन्ह्याच्या चार्जशीटमधून मेडीकल सर्टिफिकेट गायब केले अशी माहिती सोमनाथ हुलगे यांनी साप्ताहिक बंडखोरशी बोलताना दिली.

काही वर्षांपूर्वी सोमनाथ हुलगे यांनी विजय नागरी पतसंस्थेकडून कर्ज घेतले होते. मात्र सदरचे कर्ज थकीत असल्याने धैर्यशील मोहिते पाटील यांनी दिनांक २१/७/२०२२ रोजी त्यांना आपल्या ऑफिसमध्ये बोलावून घेतले होते. त्यावेळी सोमनाथ हुलगे यांनी त्याठिकाणी जाऊन थकीत कर्ज टप्प्याटप्प्याने भरतो असे म्हटल्यानंतर काका जगदाळे यांनी पाठीमागून धक्का दिला, तेव्हा सोमनाथ हुलगे यांनी त्याची गचांडी धरली. त्यामुळे धैर्यशील मोहिते पाटील यांनी सोमनाथ हुलगे यांच्या कानशिलात लगावली. तरीही भैय्यासाहेब हे सगळे चुकीचे होतंय. मी आपले जे काही थकीत कर्ज आहे त्यात तडजोड करुन दोन टप्प्यात लवकरच कर्ज देऊन टाकतो असे हुलगे म्हणाले. मात्र धैर्यशील यांनी स्वतः व राहुल उर्फ बंटी जगताप, काका जगदाळे, संतोष ऐवळे यांच्यासह हुलगे यांना जबर मारहाण करून डोक्याला रिव्हॉल्व्हर लावत तुला खल्लासच करुन टाकीन अशी धमकी दिली. त्यामुळे भयभीत झालेल्या सोमनाथ हुलगे यांनी आपल्या काही लोकांना सोबत घेऊन धैर्यशील मोहिते पाटील यांच्या विरोधात अकलूज पोलिस स्टेशनला गुन्हा दाखल केला. तेव्हा तपास अधिकारी म.पो.ई. कांबळे मॅडम यांनी धैर्यशील मोहिते पाटील यांना अटक करण्याची गरज नाही असे मुंबई हायकोर्टात सांगून सदरच्या आरोपींचा बचाव केला. त्यामुळे उपविभागीय पोलिस अधिकारी डॉ. बसवराज शिवपूजे यांनी कांबळे मॅडम यांचा गोपनीय अहवाल तयार करून उचित कार्यवाहीसाठी सोलापूर जिल्हा पोलिस अधीक्षक (ग्रामीण) पाठवला आहे. दरम्यानच्या काळात सदरच्या गुन्ह्याला कमकुवत करण्यासाठी अकलूज पोलिसांनी चार्जशीटमधून मेडीकल सर्टिफिकेटच गायब केले. मात्र सोमनाथ हुलगे यांनी हे मेडीकल सर्टिफिकेट पुन्हा मिळविण्यासाठी प्रयत्न केला असता अकलूज पोलिस स्टेशन व शासकीय रुग्णालय एकमेकांकडे टोलवाटोलवी करीत असताना दिसत आहे. त्यामुळे सोमनाथ हुलगे याप्रकरणी उपमुख्यमंत्री तथा गृहमंत्री देवेंद्र फडणवीस यांना लवकरच भेटून मुंबई हायकोर्टातून धैर्यशील यांच्यावर ३०७ प्रमाणे गुन्हा दाखल करणार असल्याचे सोमनाथ हुलगे त्यांनी सांगितले.