पुणे (बंडखोर वृत्तसेवा): सध्या लोकसभा सार्वत्रिक निवडणूक-२०२४ च्या अनुषंगाने आचार संहिता लागू आहे. त्यानुसार महाराष्ट्र शासन, नगर विकास विभाग यांचेमार्फत पुणे महानगरपालिकेतील आयुक्त, अतिरिक्त आयुक्त व उपायुक्त यांच्या बदल्या केल्या आहेत. मात्र गेल्या अनेक वर्षांपासून पुणे महानगरपालिकेत कार्यरत असलेल्या श्री. रविंद्र बिनवडे, अतिरिक्त आयुक्त (जनरल) यांची बदली केली गेली नाही. त्यामुळे आचार संहितेचा भंग होणार नाही याची दक्षता घेऊन. श्री. रविंद्र बिनवडे साहेब यांची तात्काळ बदली करावी अशी मागणी ज्येष्ठ नागरिक रमेश खामकर यांनी केली आहे.

यावेळी दिलेल्या निवेदनात रमेश खामकर यांनी म्हटले आहे की, श्री विकास ढाकणे, अतिरिक्त आयुक्त (विशेष) हे पुणे महानगरपालिकेत रुजू होऊन एक वर्षही झाले नाही, तोपर्यंत त्यांची बदली केली गेली. मात्र श्री. रविंद्र बिनवडे यांना पुणे महानगरपालिकेत रुजू होऊन अनेक वर्षे झालेली असतानाही देखील त्यांची बदली महाराष्ट्र शासनाकडून का केली जात नाही ? बिनवडे यांना दोन वेळा मसुरी येथे महाराष्ट्र शासनामार्फत प्रशिक्षणासाठी आदेश देण्यात आले होते. परंतु दोन्ही वेळेस ते रुजू झालेले नाहीत. प्रशिक्षणास रुजू न झाल्यामुळे त्यांच्यावर काही कार्यवाही झाली का ? असे अनेक प्रश्न माझ्या मनात निर्माण होत आहेत. तसा श्री. बिनवडे यांचा कार्यकाळ खूप वादग्रस्त असून यांच्याबाबत महाराष्ट्र शासनास अनेक तक्रारी दाखल असल्याचे ऐकण्यात येत आहे. त्यांच्याबद्दल अनेकदा पुणे शहरातील वृत्तपत्रात देखील बातम्या आल्या आहेत. मराठा समाज व खुल्या प्रवर्गाचे सर्वेक्षण कामी यांनी मयत, सेवानिवृत्त व निलंबित सेवकांची नियुक्ती केली. याबाबत मी शासनाकडे तक्रार देखील केली. परंतु त्यावर काही कार्यवाही झाली नाही. बिनवडे यांची भेट होणे म्हणजे नशीब चांगले आहे असे समजावे. कारण मी अनेकदा साहेबांना नियमानुसार सोमवार व शुक्रवार दु. ३ नंतर भेटण्याचा प्रत्यन केला असता अनेकदा ते मला भेटलेले नाही. नागरिकांना भेटण्याच्या वेळी जाणूनबुजून खातेप्रमुख यांच्याबरोबर मिटिंग ठेवली जाते. कोणाला चिठ्ठी देऊ नका असे आदेश देतात. मी जेष्ठ नागरिक असून मला अनेकदा हेलपाटे मारावे लागले आहेत. आरोग्य विभागाकडील तक्रारी घेऊन बिनवडे यांच्याकडे मी गेलो असता दखल घेतली गेली नाही. त्यांच्याबाबत तक्रार करून कोणतीही कारवाई करण्यात आलेली नाही. श्री बिनवडे यांची बदली होत नाही, तसेच ते मसुरी येथे प्रशिक्षणास गेले नाहीत यामागे राजकीय शक्ती असल्याची चर्चा पुणे महानगरपालिकेमध्ये सध्या सुरु आहे. लोकसभा सार्वत्रिक निवडणूक- २०२४ च्या अनुषंगाने भारतीय निवडणूक आयोगाचे महानगरपलिकांमधील आयुक्त, अतिरिक्त आयुक्त व उपायुक्त या पदावरील अधिकाऱ्यांच्या बदल्या केल्या जातात. तसेच एक वर्ष सेवा केलेले श्री. ढाकणे यांचीही बदली केली जाते. परंतु श्री. बिनवडे यांची अनेक वर्षे पुणे महानगरपालिकामध्ये सेवा कार्यकाळ झालेला असून देखील त्यांची बदली का होत नाही ? खरंच त्यांचे राजकीय मंत्र्यांशी हितसंबंध आहेत का ? तक्रार केली तरी कोणतीही कारवाई का होत नाही ? असे अनेक प्रश्न माझ्या मनात निर्माण होत आहेत. त्यामुळे आदर्श आचारसंहितेचे उल्लंघन होऊ नये यासाठी मुख्य निवडणूक आयुक्त श्री. रविंद्र बिनवडे यांची बदली करण्याचे आदेश द्यावेत अशी मागणी रमेश खामकर यांनी केली आहे. सदर निवेदनाच्या प्रति त्यांनी मुख्य निवडणूक आयुक्त, निवडणूक आयुक्त, महाराष्ट्र राज्य निवडणूक आयुक्त, महाराष्ट्र राज्य मुख्य सचिव यांना पाठविल्या आहेत.