माढा (बंडखोर वृत्तसेवा): माढा मतदार संघातून तुतारी चिन्हावर लढण्यासाठी रासपाचे सर्वेसर्वा महादेव जानकर आज पुण्यात खासदार शरद पवारसाहेबांची भेट घेणार आहेत. गतवेळी खासदार सुप्रियाताई सुळेयांच्या विरोधात रासपाचे महादेव जानकर यांना ४ लाख ५० हजार मते बारामती लोकसभा मतदार संघातून मिळाली होती. त्यामुळेच महादेव जानकरांना माढा लोकसभेची उमेदवारी दिल्यास खा. सुप्रियाताई सुळे यांनाबारामतीतून महादेव जानकारांची मदत घेता येईल व खा. सुप्रियाताई सुळेंचा विजय सुलभच होईल असे राजकीय आडाखे बांधल्याचे शरद पवारांच्या अंतर्गत गोटातून समजले आहे. त्यामुळे माढ्यातून धैर्यशील मोहिते पाटील तुतारी हातात घेण्याची चर्चा जोर धरत असतानाच महादेव जानकर शरद पवारांना भेटणार असल्याने माढ्यात तुतारी कोण वाजविणार? रासपाचे महादेव जानकर की धैर्यशील मोहिते पाटील? असे प्रश्न राजकीय जाणकारांमध्ये उपस्थित होत आहेत. माढ्याचा तिढा सुटला, आता बारामतीकडे लक्ष केंद्रित करून बारामती जिंकायचीच आहे असे भाजपाचे सर्वेसर्वा उपमुख्यमंत्री देवेद्रजी फडणवीस यांनी म्हटले आहे. रामराजे नाईक निंबाळकरांना सागर बंगल्यावर बोलावून घेऊन त्यांची समजूत घालण्यात फडणवीस यशस्वी झालेले आहेत, त्यामुळेच माढ्याचा तिढा सुटला असे आत्मविश्वासाने त्यांनी जाहिर केले आहे. दुसऱ्या बाजुला रासपाची देशभरातील ताकद, इतर राज्यातील निवडून आलेल्या आमदारांची ताकद,फुले-शाहू-आंबेडकर चळवळीतील झुंजार व्यक्तीमत्व, मंत्रीपदाचा आणि प्रशासनाचा अनुभव असणारे आणि बारामती मतदारसंघातून रासपाची मदत होईल या दुरदृष्टीकोनातून राजकीय मुत्सद्देगिरीतून आज महादेव जानकर यांचे माढा मतदार संघात उमेदवारी मिळण्यात पारडे जड असल्याचे दिसत आहे. माढा लोकसभा मतदारसंघात एक नंबरला धनगर समाज लोकसंख्येच्या दृष्टीने आहे. या सर्व बाबींचा विचार करता तुतारीमाजी मंत्री महादेव जानकारांना मिळण्याची दाट शक्यता आहे असे राजकीय जाणकारातून बोलले जात आहे.