माढा (बंडखोर वृत्तसेवा): २०१९ च्या माळशिरस विधानसभा निवडणुकीत उत्तमराव जानकर यांना १ लाख ९१७ मतं मिळाली होती, तर भाजपाचे आमदार रामभाऊ सातपुते यांना १ लाख ३ हजार ५०७ मतं मिळाली होती. तेव्हा मोहिते पाटलांच्या माळशिरस तालुक्यातून आमदार रामभाऊ सातपुते यांना केवळ २५९० मतांचे लीड मिळाले होते. म्हणजेच मोहिते पाटलांंबरोबर के. के. पाटील, रंजनभाऊ गिरमे, प्रकाश पाटील यांनी आमदार रामभाऊ सातपुते यांना निवडून आणण्यासाठी दिवसरात्र करूनही फक्त १२९५ मतांची आघाडी त्यांना मिळाली होती. यावरूनच यात मोहिते पाटलांची किती मतं असतील हे दिसत असतानाही खासदार रणजितसिंह नाईक निंबाळकर यांना आम्हीच एक लाखाचे लीड मिळवून दिले असा सूर मोहिते पाटील समर्थकांतून निघत असल्याने आश्चर्य व्यक्त केले जात आहे.
मोहिते पाटलांनी भाजपात प्रवेश केल्यानंतर भाजपाने माढा लोकसभा मतदारसंघातून खासदार रणजितसिंह नाईक निंबाळकर यांना उमेदवारी दिली होती. तेव्हा भाजपाने त्यांना निवडून आणण्याची जबाबदारी मोहिते पाटलांवर सोपवल्यावर राष्ट्रवादी काँग्रेसमधील घुसमटीला वैतागून भाजपात प्रवेश केलेल्या मोहिते पाटलांनी नाईलाजाने त्यांना खासदार करण्यासाठी आपली ताकद लावली. परंतु यादरम्यान रणजितसिंह नाईक निंबाळकर यांना खासदार करण्यासाठी डॉ. धवलसिंह मोहिते पाटील, एक लाखांहून जास्त मतं घेतलेले उत्तमराव जानकर, के. के. पाटील, प्रशांत परिचारक, रंजनभाऊ गिरमे, प्रकाश पाटील यांच्यासह जुन्या भाजपाच्या बहुसंख्य पदाधिकारी व कार्यकर्त्यांनी अक्षरशः जीवाचे रान केले. मग तरीही मोहिते पाटील खासदार रणजितसिंह नाईक निंबाळकर यांना आम्हीच एक लाखाचे लीड मिळवून दिल्याचा दावा कशाच्या आधारावर करतात? माळशिरस विधानसभा निवडणुकीत तुमची ताकद दिसून आलीच आहे. तरीही तुम्ही इतरांची मतं ही आमचीच मतं म्हणून जनतेची व भाजपा पक्षश्रेष्ठींची दिशाभूल का करीत आहात? खासदार रणजितसिंह नाईक निंबाळकर यांच्या मतांमध्ये कुणाकुणाचे योगदान आहे हे जनतेला व भाजपाश्रेष्ठींनाही चांगलेच ठाऊक आहे. त्यामुळे आपला एक लाखाच्या लीडचा दावा हा फुसका बार असल्याचे सर्वांनाच माहिती असल्याने आपल्या या दाव्याबद्दल जनतेसह भाजपा पदाधिकाऱ्यांमध्येही उलटसुलट चर्चा होताना दिसत आहे.