धैर्यशील मोहिते पाटील यांच्या विरोधात उपमुख्यमंत्री देवेंद्र फडणवीस यांच्याकडे तक्रार दाखल

अकलूज (बंडखोर वृत्तसेवा): साप्ताहिक बंडखोरचे संपादक गौतम आप्पा भंडारे यांनी माढा लोकसभा मतदारसंघाचे सडेतोड राजकीय विश्लेषण करून धैर्यशील मोहिते पाटील यांची पोलखोल करायला सुरुवात केली. त्यामुळे त्यांच्या समर्थकांनी सोशल मीडियाच्या माध्यमातून गौतम भंडारे यांच्याबद्दल अपशब्द वापरत त्यांच्याशी हुज्जत घालण्याचा प्रयत्न केला. तर गौतम भंडारे अकलूज परिसरातून मोटारसायकलवर फिरत असताना काही कार्यकर्ते त्यांच्या पाळतीवर राहिले. त्यामुळे साप्ताहिक बंडखोरचे संपादक गौतम आप्पा भंडारे यांनी धैर्यशील मोहिते पाटील यांच्या विरोधात मुख्यमंत्री व उपमुख्यमंत्र्यांसह संबंधित पोलिस अधिकाऱ्यांना ई मेलवरून तक्रारअर्ज पाठवला. तेव्हा उपमुख्यमंत्री देवेंद्र फडणवीस यांनी या तक्रार अर्जाची तात्काळ दखल घेऊन पुढील कार्यवाहीसाठी अपर मुख्य सचिव गृह विभाग यांच्याशी पत्रव्यवहार केला आहे.

यावेळी गौतम भंडारे यांनी दिलेल्या तक्रारीअर्जात म्हटले आहे की, मी गेल्या १२ वर्षांपासून साप्ताहिक बंडखोर हे वृत्तपत्र चालवत असून माझ्या वृत्तपत्रातून मी बेधडकपणे सत्य त्या बातम्या छापून लोकशाहीच्या चौथ्या स्तंभाचे काम प्रामाणिकपणे करीत आहे. मी वेळोवेळी अकलूजकर मोहिते पाटील यांच्या राजकीय भूमिकेचे रोखठोक विश्लेषण करण्याबरोबरच त्यांचा पर्दाफाश करीत असतो. तसेच त्यांच्याकडून सर्वसामान्यांवर होत असलेल्या अन्याय अत्याचाराला वाचा फोडण्याचे काम करीत असतो. मात्र माजी उपमुख्यमंत्री विजयसिंह मोहिते पाटील यांचे पुतणे धैर्यशील राजसिंह मोहिते पाटील हे रियल गुंड प्रवृत्तीचे आहेत. त्यांनी साम, दाम, दंड, भेद या नितीचा वापर करून अनेकांना संपवले आहे. आपल्या विरोधात कुणी काम करीत असेल, आणि तो ऐकतच नसेल तर त्याच्यावर खोट्या केसेस करून त्याला आयुष्यातून संपविणे, विरोधात काम करणाऱ्याला आपल्या समर्थकांकडून मारहाण करणे अशा पध्दतीने धैर्यशील राजसिंह मोहिते पाटील आपल्या विरोधात काम करणाऱ्यांना टार्गेट करून कुठल्याही थराला जात असतात. त्यांनी अशाच पध्दतीने अकलूज परिसरातील विरोधकांना संपवले आहे. वास्तविक पाहता साप्ताहिक बंडखोरमध्ये मी जे मांडत असतो त्या जनतेच्या मनातील भावना असतात. अन्याय अत्याचाराच्या विरोधातील विद्रोह असतो, मात्र तो त्यांना सहन होत नाही. धैर्यशील राजसिंह मोहिते पाटील हे खुनशी प्रवृत्तीचे असल्याने ते माझ्याविरोधात काहीही करू शकतात. धैर्यशील राजसिंह मोहिते पाटील हे माळशिरस तालुक्यासह सोलापूर जिल्ह्याचे राजकारण पहात असतात. माढा लोकसभा मतदारसंघातून धैर्यशील मोहिते पाटील हे इच्छुक आहेत. विद्यमान खासदार रणजितसिंह नाईक निंबाळकर यांना पक्षश्रेष्ठींनी पुन्हा एकदा माढा लोकसभा मतदारसंघातून खासदारकीची तयारी करायला सांगितल्याने ते माढा लोकसभा मतदारसंघातील नेते व कार्यकर्त्यांच्या गाठीभेटी घेत फिरत आहेत. तर धैर्यशील मोहिते पाटील त्यांच्या विरोधात सक्रीय होऊन खासदारकीची तयारी करीत आहेत. या पार्श्वभूमीवर मी बंडखोर वेब पोर्टल व साप्ताहिक बंडखोरमधून माढा लोकसभा मतदारसंघाचे राजकीय विश्लेषण करीत असताना धैर्यशील मोहिते पाटील व त्यांच्या परिवाराची वास्तव परिस्थिती जनतेसमोर मांडण्याचे काम करीत आहे. त्यामुळे धैर्यशील मोहिते पाटील यांच्यासह त्यांचे समर्थक चांगलेच चवताळलेले दिसत आहेत. मी ग्रुपवर वेब पोर्टलची बातमी किंवा साप्ताहिक बंडखोरचा अंक टाकल्यानंतर त्याच्याखाली त्यांचे समर्थक आक्षेपार्ह कमेंट करीत आहेत, माझ्याशी हुज्जत घालत आहेत. यावरून त्यांचे समर्थक मला कुठेही इजा पोहचवू शकतात किंवा जीवघेणा हल्लाही करू शकतात. मी पत्रकार असल्याने मला सर्वत्र मोटारसायकलवर फिरावे लागते. त्यावेळी दबा धरून धैर्यशील मोहिते पाटील यांचे समर्थक माझा कुठेही आणि कधीही कार्यक्रम करू शकतात. त्यामुळे माझ्या जीविताचे काही बरेवाईट झाले तर त्यास धैर्यशील मोहिते पाटील हेच जबाबदार असतील असे यावेळी साप्ताहिक बंडखोरचे संपादक गौतम भंडारे यांनी म्हटले आहे. गौतम भंडारे यांनी सदरचा तक्रारअर्ज महाराष्ट्र राज्य अनुसूचित जाती आयोग, मुख्यमंत्री एकनाथजी शिंदे, उपमुख्यमंत्री अजितदादा पवार, उपमुख्यमंत्री तथा गृहमंत्री देवेंद्रजी फडणवीस, महाराष्ट्र राज्य पोलिस महासंचालक, सोलापूर जिल्हा पोलिस अधीक्षक (ग्रामीण), अकलूजचे उपविभागीय पोलिस अधिकारी यांना पाठवल्या आहेत.