रणजितसिंह मोहिते पाटील यांची सासरवाडी ही नागपूरच्या भोसले घराण्यातील आहे. देवेंद्र फडणवीस हे भोसले घराण्याचा आदर करीत असल्यामुळेच रणजितसिंह मोहिते पाटील यांची भाजपातून हकालपट्टी होत नाही अशी चर्चा आहे.

माजी आमदार रामभाऊ सातपुते हे उपमुख्यमंत्री अजित पवारांना भेटून मोहिते पाटील तुमच्याकडे पाया पडत आले तरी त्यांना दारात उभे करु नका असे म्हणाले होते. तरीही खासदार धैर्यशील मोहिते पाटील व आमदार रणजितसिंह मोहिते पाटील हे दोघेजण आम्ही तुमच्याकडे चार-पाच आमदार घेऊन येतो, आम्हाला सत्तेत थोडा तरी वाटा द्या असे म्हणत अजित पवारांना भेटायला गेले होते असे अजित पवारांच्या निकटवर्तीयांकडून समजले. मात्र जे भाजपाचे होऊ शकले नाहीत, जे शरद पवारांचे होऊ शकले नाहीत, ते अजितदादा पवारांचे तरी होतील का? असा प्रश्न उपस्थित होत आहे.

अकलूज (बंडखोर वृत्तसेवा): भाजपाचे विधानपरिषदेचे आमदार रणजितसिंह मोहिते पाटील यांनी पक्षविरोधी कार्य केल्याचे पुरावे देऊन माजी आमदार रामभाऊ सातपुते यांनी भाजपा प‌क्षश्रेष्ठींकडे त्यांच्या हकालपट्टीची मागणी केली आहे. त्यानंतर माजी खासदार रणजितसिंह नाईक निंबाळकर यांनीही रणजितसिंह यांची भाजपातून हकालपट्टी व्हावी यासाठी देवेंद्र फडणवीस यांच्याकडे जोर लावल्याने रणजितसिंह मोहिते पाटील यांची भाजपातून लवकरच हकालपट्टी होणार असल्याचे भाजपातील खास सूत्रांकडून समजते.
भाजपा पक्ष हा शिस्तप्रिय पक्ष म्हणून ओळखला जातो. या पक्षात निष्ठावंतांची कदर केली जाते, तर अतिमहत्वाकांक्षी नेत्यांचा बिमोडच केला जातो. आमदार रणजितसिंह मोहिते पाटील यांनी तर भाजपाच्या पाठीत खंजीर खुपसण्याचेच काम केले आहे. देवेंद्र फडणवीस यांचा इतिहास पाहिला तर जो त्यांच्याशी नडला त्यांना गाडण्याचेच काम त्यांनी केले आहे. माजी उपमुख्यमंत्री विजयसिंह मोहिते पाटील हे बडे नेते असल्याने त्यांचा मान राखून देवेंद्र फडणवीस थोडे शांत होते. मात्र लोकसभा निवडणुकीनंतर रणजितसिंह मोहिते पाटील यांनी विधानसभा निवडणुकीतही माजी आमदार रामभाऊ सातपुते यांच्या विरोधात काम करुन उत्तम जानकरांना ताकद देण्याचे काम केले. त्याबद्दलचे पुरावे रामभाऊ सातपुते यांनी पक्षश्रेष्ठींना दिले आहेतच. मात्र रणजितसिंहांनी साताऱ्यातील एका भाजपाच्या आमदाराकडे जाऊन तुम्ही राष्ट्रवादी काँग्रेस शरद पवार गटात प्रवेश करा, भाजपाचे ५० आमदार निवडून येत नाहीत. तुम्ही मंत्री व्हाल असे म्हणून त्यांना फोडण्याचा प्रयत्न केला. ही बाब त्या आमदाराने देवेंद्र फडणवीस यांना सांगितली. त्यामुळे याबाबत गद्दारांना क्षमा नाही अशी पोस्ट रामभाऊ सातपुते यांनी ट्विटरवर टाकली आहे. रामभाऊ हे विद्यार्थी दशेपासूनच भाजपाचे निष्ठावंत कार्यकर्ते आहेत. त्यामुळे पक्षविरोधी कार्य करणाऱ्या मोहिते पाटलांच्या विरोधात ते चांगलेच पेटून उठले आहेत. देवेंद्र फडणवीस यांच्या भेटीनंतर रामभाऊ सातपुते यांनी मुख्यमंत्री एकनाथ शिंदे व उपमुख्यमंत्री अजित पवार यांचीही भेट घेऊन मोहिते पाटील तुमच्या पाया पडले तरी त्यांना तुम्ही पक्षात घेऊ नका असे म्हणाले आहेत. त्यांच्यापाठोपाठ माजी खासदार रणजितसिंह नाईक निंबाळकर यांनीही रणजितसिंह मोहिते पाटील यांचा खरपूस समाचार घेऊन पक्षश्रेष्ठींकडे त्यांच्या हकालपट्टीची मागणी केली आहे. सूत्रांकडून मिळालेल्या माहितीनुसार लोकसभा निवडणुकीत मोहिते पाटलांनी भाजपाशी गद्दारी केल्यानंतर देवेंद्र फडणवीस यांच्यासह भाजपा पक्षश्रेष्ठी मोहिते पाटलांवर प्रचंड चिडले होते. परंतु विधानसभा निवडणूक होईपर्यंत त्यांनी शांत भूमिका घेऊन विधानसभा निवडणुकीनंतर मोहिते पाटलांच्या मागे लागायचे असे ठरविले होते. त्यामुळे आता पक्षश्रेष्ठी लवकरच रणजितसिंह मोहिते पाटील यांची भाजपातून हकालपट्टी करुन त्यांच्यामागे शुक्लकाष्ठ लावणार असल्याचे खास सूत्रांकडून समजते.