अकलूज (बंडखोर वृत्तसेवा): भाजपात कार्यकर्त्यांना अनन्यसाधारण महत्त्व आहे. ज्या ठिकाणी पदाधिकाऱ्यांची नियुक्ती होते त्या पदाधिकाऱ्यांना त्यांचा पूर्ण अधिकार देऊन भाजपा आपल्या कार्यकर्त्यांची कदर करते. या पक्षात इतर पक्षाप्रमाणे हुकूमशाही चालत नाही. जेव्हा मोहिते पाटील सत्ताधारी होते तेव्हा त्यांच्याकडेच सर्वाधिकार असायचे, पदाधिकारी हे नावापुरतेच होते. पण भाजपाने तालुका मंडळ अधिकारी सुजयसिंह माने पाटील यांच्याकडे एबी फॉर्म काय दिले तर त्यांच्या समर्थकांनी राम सातपुते यांच्या पॅकअपची भाषा सुरू केली. दरम्यान त्यांनी राम सातपुते यांच्याबद्दल निगेटिव्ह लिखाण करुन मोहिते पाटील समर्थकांनी पॅकअपची कितीही स्वप्ने पाहिली तरी त्यांची ती स्वप्नेच राहतील यात तिळमात्र शंका नाही.
राम सातपुते यांनी मोहिते पाटलांच्या विरोधात रणशिंग फुंकल्यापासून त्यांच्या पाठीशी दिवसेंदिवस हजारो कार्यकर्त्यांचा जनसमूह वाढत आहे. पूर्वी उत्तम जानकरांनी मोहिते पाटलांच्या विरोधात तीव्र संघर्ष केला. परंतु आमदारकीसाठी त्यांनी आपला स्वाभिमान मोहिते पाटलांच्या पायाशी गहाण ठेवल्यामुळे पारंपरिक मोहिते पाटील विरोधक त्यांच्यापासून दुरावले. या सर्व विरोधकांनी राम सातपुते यांच्या नेतृत्वाखाली मोहिते पाटलांच्या विरोधात आपली भूमिका कायम ठेवली. वास्तविक पाहता राम सातपुते हे विद्यार्थी दशेपासून रस्त्यावरच्या लढाईत सक्रिय आहेत. त्यामुळे एखादा परिवर्तनवादी लढा उभा करणे हे त्यांच्या डाव्या हाताचे काम आहे. राम सातपुते यांची आक्रमक भाषाशैली, झपाटून काम करण्याची पध्दत माळशिरस तालुक्यातील ७० वर्षांची हुकूमशाही हळूहळू मोडीत काढत आहे. यास पालकमंत्री जयकुमार गोरे यांचीही मोलाची साथ मिळत आहे. ना. जयकुमार गोरे यांनीही मोहिते पाटलांच्या विरोधात आक्रमकपणे काम करायला सुरुवात केल्यामुळे मोहिते पाटलांकडून जयकुमार गोरे व राम सातपुते यांनाच टार्गेट केले जात आहे. मोहिते पाटील व उत्तम जानकर या दोघांची युती असताना राम सातपुते यांचा विधानसभा निवडणुकीत निसटता पराभव झाला. अकलूज नगरपरिषद निवडणुकीत राम सातपुते यांनी स्वतः पूर्ण अकलूज पिंजून काढून भाजपाचे चार नगरसेवक निवडून आणले. तर नगराध्यक्ष पदासाठी १० हजार मतं घेऊन नगराध्यक्षपद जिंकता जिंकता हरले. चार ते पाच नगरसेवक उमेदवारांचा अल्पशा मतांनी पराभव झाला. त्यामुळे राम सातपुते यांची काय ताकद आहे हे सर्वांनाच समजले. मुख्यमंत्री देवेंद्र फडणवीस यांनी राम सातपुते यांच्याकडे दुर्लक्ष केले आहे अशा अफवा पसरवून मोहिते पाटील समर्थकांना काय साध्य करायचे? अकलूज नगरपरिषद निवडणुकीच्या प्रचारात मुख्यमंत्री देवेंद्र फडणवीस मुद्दाम आले नाहीत अशी मोहिते पाटील समर्थक चर्चा करीत असले तरी राम सातपुते यांनीच त्यांना किरकोळ निवडणुकीला येऊ दिले नाही हेच सत्य आहे. राम सातपुते या आक्रमक चेहऱ्याला थोपविण्यासाठी आता बऱ्याच पक्षांनी मिळून युती केली आहे. कारण त्यांनी माळशिरस तालुकाच हायजॅक केला आहे. मोहिते पाटलांना प्रखर विरोध करुन भाजपाच्या माध्यमातून त्यांनी हुकूमशाही मोडीत काढण्याबरोबरच काही डबल ढोलकीवाल्यांचे बुरखेही फाडले आहेत. आपल्या स्वाभिमानी समर्थकांसह राम सातपुते यांनी माळशिरस तालुक्यातील हुकूमशाही, एकाधिकारशाही मोडीत काढण्यासाठी जोरदार लढा उभा केला आहे. म्हणूनच ते आता लवकरच अकलूजमध्ये बंगला बांधून अकलूजचे रहिवाशी होणार आहेत. त्यामुळे मोहिते पाटील समर्थकांनो, तुम्ही राम सातपुते यांच्या पॅकअपची फक्त स्वप्नेच बघत बसा…!