माढा (बंडखोर वृत्तसेवा): मोहिते पाटलांचे आम्हीच कट्टर विरोधक म्हणून वावरत बड्या नेत्यांकडून आपला स्वार्थ साधून घेणारे आणि ऐनवेळी बोटचेपेपणाची भूमिका घेऊन मोहिते पाटलांना पोषक वातावरण निर्माण करीत राजकीय सारीपाटात डबल ढोलकी वाजविणाऱ्यांना मोहिते पाटील विरोधकांनी वेळीच ओळखणे गरजेचे आहे. कारण माढा लोकसभा मतदारसंघातून धैर्यशील मोहिते पाटील विरूद्ध खासदार रणजितसिंह नाईक निंबाळकर अशी अटीतटीची लढत होत असताना फत्तेसिंह माने पाटील यांनी तटस्थ भूमिका घेऊन मोहिते पाटलांना पोषक वातावरण निर्माण करण्याचा प्रयत्न केला आहे. त्यामुळे मोहिते पाटील विरोधक म्हणून त्यांनी जो मुखवटा घातला होता तो गळून पडल्याने डबल ढोलकी नकली विरोधक फत्तेसिंह माने पाटलांना वेळीच ओळखून खड्यासारखे बाजूला काढा असे अकलूजसह परिसरातील कट्टर मोहिते पाटील विरोधकांतून बोलले जात आहे.

सध्याची परिस्थिती बघितली तर मोहिते पाटील विरोध म्हणजे काही लोकांचा धंदा झालेला आहे. सोशल मीडिया व प्रसारमाध्यमांतून मोहिते पाटलांना विरोध करण्याचे नाटक करायचे आणि मोहिते पाटील विरोधकांशी संबंध वाढवून आपली पोळी भाजून घेण्याचे धंदे जोरात सुरू आहेत. उत्तम जानकर यांनी उपमुख्यमंत्री देवेंद्र फडणवीस यांना भेटायला स्पेशल विमानात जाऊन आपला भाव वाढवला, त्यानंतर मोहिते पाटलांच्या डुबत्या नौकेला त्यांनी काठावर आणण्यासाठी धडपड केली. यावरुनच उत्तम जानकर हे मोहिते पाटलांनी पोसलेले नकली विरोधक होते हेच दिसून आले. जानकरांचा नकली मुखवटा गळून पडल्यानंतर ऍड. सोमनाथ वाघमोडे यांच्या पुढाकाराने माळशिरस तालुक्यात मोहिते पाटील विरोधकांची तिसरी आघाडी स्थापन झाली. त्यामुळे जानकरांच्या पाठीशी न जाता कट्टर मोहिते पाटील विरोधकांनी तिसऱ्या आघाडीच्या माध्यमातून मोहिते पाटलांच्या विरोधात आपले काम अविरतपणे सुरू ठेवले. मात्र अकलूजमध्ये फत्तेसिंह माने पाटील यांनी कुणाच्याच बाजूने काम न करता तटस्थ भूमिका घेतल्याने ते डबल ढोलकी नकली विरोधक असल्याची चर्चा कट्टर मोहिते पाटील विरोधकांमध्ये सुरू आहे. काही वर्षांपूर्वी सदुभाऊ चौकात सदाशिवराव माने पाटील यांचा पुतळा असताना जयसिंह मोहिते पाटलांनी त्याच चौकात सहकारमहर्षी शंकरराव मोहिते पाटील यांचा पुतळा बसविण्याचे काम सुरू केल्यावर मोहिते पाटील व माने पाटील परिवारात दरी निर्माण झाली. तेव्हापासून फत्तेसिंह माने पाटील व हिंदुराव माने पाटील यांनी मोहिते पाटलांच्या विरोधात काम सुरू केले. २०२१ च्या अकलूज ग्रामपंचायतीच्या निवडणुकीत फत्तेसिंह माने पाटील यांचे बंधू काकासाहेब माने पाटील यांचे पुत्र गिरीराज माने पाटलांनी संग्रामसिंह मोहिते पाटील यांचा पराभव केला होता. तिथून तर मोहिते पाटील व माने पाटील परिवारात आणखी दुरावा निर्माण झाला होता. त्यामुळे मोहिते पाटील विरोधक माने पाटलांना मोहिते पाटलांचे कट्टर विरोधक समजू लागले. परंतु धैर्यशील मोहिते पाटील माढा लोकसभा मतदारसंघातून निवडणुकीस उभे राहिल्यानंतर फत्तेसिंह माने पाटील यांनी तटस्थ भूमिका घेतल्यामुळे अनेकांच्या भुवया उंचावल्या आहेत. आपण जर एखाद्याच्या विरोधात काम करीत असाल तर फाटी आखूनच विरोध केला पाहिजे, बोटचेपेपणाची भूमिका घेऊन चालत नाही.‌ अकलूज परिसरात रंजनभाऊ गिरमे हेच कट्टर मोहिते पाटील विरोधक आहेत. म्हणूनच वेळोवेळी त्यांना टार्गेट केले जाते. तरीही न डगमगता प्रस्थापित मोहिते पाटलांच्या विरोधात एकाकीपणे लढत असल्याने त्यांच्यासह माळशिरस तालुक्यातील कट्टर मोहिते पाटील विरोधकांना ताकद मिळणे गरजेचे आहे. एकंदरीत स्वतःला कट्टर मोहिते पाटील विरोधक भासवून मोहिते पाटील विरोधकांकडून मदत घेणे आणि कट्टर मोहिते पाटील विरोधक असलेल्या कार्यकर्त्यांना मोहिते पाटील विरोधकांची ताकद मिळू न देणे यामुळे डबल ढोलकी नकली विरोधकांचे फावते, आणि अकलूज परिसरात कट्टर मोहिते पाटील विरोधकही ते मोठे होऊ देत नाहीत. त्यामुळे सोलापूर जिल्ह्यासह महाराष्ट्रातील मोहिते पाटील विरोधकांनी असली, नकली कोण? डबल ढोलकी वाजविणारा कोण? व मोहिते पाटलांच्या विरोधात प्राणपणाने लढणारा कोण? हे ओळखून लढणाऱ्या कार्यकर्त्यांना ताकद द्यावी व डबल ढोलकी, संधीसाधू नकली मोहिते पाटील विरोधकांना खड्यासारखे बाजूला काढावे असा सूर मोहिते पाटील विरोधकांतून निघत आहे.