उपमुख्यमंत्री देवेंद्र फडणवीस यांनी भाजपाची ताकद वाढावी म्हणून संजय शिंदे यांना जिल्हा परिषद सोलापूरचे अध्यक्ष होण्यासाठी मदत केली. मात्र मोहिते पाटलांनी भाजपात प्रवेश केल्यानंतर जेव्हा ना. फडणवीस यांनी २०१९ साली त्यांना भाजपाची माढा लोकसभेची उमेदवारी देऊ केली, तेव्हा त्यांनी फडणवीस यांना फसवून राष्ट्रवादीकडून लोकसभेथची निवडणूक लढवली. दरम्यान माढ्यातून मुंबईपर्यंत जाईपर्यंत संजय शिंदे कुठे जातील हे कुणालाच सांगता येत नाही. २०१९ साली संजय शिंदे नको म्हणून माढ्यातील जनतेने तुम्हाला मतदान केले. परंतु तुम्ही सत्तेसाठी त्यांनाच गोंजारण्याचेच काम करीत असला तरी ना. देवेंद्र फडणवीस यांना त्यांनी फसवले. मग खासदार महोदय, तुम किस झाड की पत्ती?

माढा (बंडखोर वृत्तसेवा): पक्षश्रेष्ठींच्या आदेशामुळे ज्यांना कुणी ओळखतही नव्हते, त्या रणजितसिंह नाईक निंबाळकर यांना मोहिते पाटलांनी माढा लोकसभा मतदारसंघातून खासदार करताना माळशिरस तालुक्यातून सुमारे सव्वा लाखाचे लीड मिळवून दिले होते. मात्र खासदार झाल्यापासून रणजितसिंह नाईक निंबाळकर यांनी मोहिते पाटील विरोधकांच्या टोळक्यात राहून त्यांच्याच विरोधात राजकीय कुरघोड्या करायला सुरुवात केली. परंतु दिव्यासमोर उभे राहिल्यावर आपली सावली पाहून आपण खूपच मोठे झाल्याचा भास होतो तसा सत्तेच्या धुंदीत त्यांना भास झालेला असला तरी अस्तित्वशून्य मोहिते पाटील विरोधकांच्या विश्वासावर त्यांनी लोकसभा निवडणुकीसाठी कितीही जोर लावला तरी मोहिते पाटीलरूपी वादळात शक्तिहीन रणजितसिंह नाईक निंबाळकर भुईसपाटच होणार अशी चर्चा राजकीय जाणकारांतून केली जात आहे.
वास्तविक पाहता भारतीय जनता पार्टी हा शिस्तबध्द पक्ष आहे. स्वतः माढ्यातून पुन्हा मीच उमेदवार आहे असे म्हणून खासदार रणजितसिंह नाईक निंबाळकरांनी गेल्या दहा महिन्यांपासून निवडणुकीची मोर्चेबांधणी करणे ही भाजपासारख्या सुसंस्कृत पक्षासाठी भूषणावह बाब नाही. याला आम्ही तर टगेगिरीच म्हणतो. पण भाजपामधील काही नेत्यांना ही टगेगिरी रुचत आहे की काय असेच वाटते. कारण उपमुख्यमंत्री देवेंद्र फडणवीस यांचे अगदी जवळचे असणारे श्रीकांत भारतीय हे सुध्दा खासदार रणजितसिंह नाईक निंबाळकर यांचेच समर्थन करतात. तर प्रदेशाध्यक्ष चंद्रशेखर बावनकुळे हे सुध्दा त्यांच्यावर स्तुतिसुमने उधळताना दिसत आहेत. कारण खासदार रणजितसिंह नाईक निंबाळकर हे आपल्याला पुन्हा माढ्यातून उमेदवारी मिळावी म्हणून नेहमीच या दोन्ही नेत्यांच्या मागेपुढे करताना माढा लोकसभा मतदारसंघातील जनतेने पाहिले आहे. प्रदेशाध्यक्ष चंद्रशेखर बावनकुळे पुण्यात आल्यानंतर तिथेही आपल्या उमेदवारीसाठी खासदार निंबाळकर यांनी हजेरी लावली होती. परंतु चंद्रशेखर बावनकुळे हे भाजपाचे प्रदेशाध्यक्ष असले तरी काही दिवसांपूर्वी त्यांचा व्हायरल झालेला कथित व्हिडीओ पाहून त्यांच्या व्यक्तिमत्वाबद्दल शंका उपस्थित होत आहे. एकूणच खासदार रणजितसिंह नाईक निंबाळकर हे माढा लोकसभा मतदारसंघातील मोहिते पाटील विरोधक टोळक्याच्या संपर्कात राहून आपल्या उमेदवारीची जय्यत तयारी करीत असताना मोहिते पाटील यांनी जनसंपर्क अभियान राबवून जनतेच्या विकासावर भर दिला आहे. दरम्यान २००९ पासून माळशिरस विधानसभा मतदारसंघ एससीसाठी राखीव झाल्यानंतर मोहिते पाटील यांना आमदारकीपासून वंचित रहावे लागले. तर गेल्यावेळी भाजपाश्रेष्ठींच्या आदेशानुसार त्यांनी नवख्या रणजितसिंह नाईक निंबाळकर यांना माळशिरस तालुक्यातून सुमारे सव्वा लाखाचे लीड देत माढ्यातून खासदार केले. त्यामुळे लाखो लोकांचा आधारवड असलेल्या मोहिते पाटील परिवारातील धैर्यशील मोहिते पाटील या विकासाचा ध्यास व राजकीय दूरदृष्टी असलेल्या नेतृत्वाला माढा लोकसभा मतदारसंघातून संधी मिळावी अशी चर्चा माढा लोकसभा मतदारसंघातून होत आहे. दरम्यान मोहिते पाटील घराण्याची आता चौथी पिढी सक्षमपणे राजकारण करीत आहे. राजकीय पार्श्वभूमीचा आढावा घेतला तर विरोधकांच्या टोळक्यात असलेल्या अनेक नेत्यांना मोहिते पाटील यांनी मोठे केले आहे. तर मोहिते पाटील यांनी सत्तेत असताना सध्या सत्तेत असलेल्या अनेक दिग्गज नेत्यांची कामे केल्याने त्यांना मोहिते पाटलांचा कमालीचा आदर आहे. त्यामुळे माढा लोकसभा मतदारसंघातील अस्तित्वशून्य मोहिते पाटील विरोधकांनी मोहिते पाटलांना रोखण्यासाठी कितीही आदळआपट केली तरी सरड्याची धाव कुंपणापर्यंत असे म्हटले तरी वावगे ठरणार नाही. बेडूक कितीही फुगला तरी बैल होऊ शकत नाही असेच मोहिते पाटील यांना आव्हान देणाऱ्या टोळक्याबद्दल म्हटले तरी वावगे ठरणार नाही. खासदार रणजितसिंह नाईक निंबाळकर मला चार आमदारांचा पाठिंबा आहे असे म्हणत आहेत. मात्र त्यापैकी तीन आमदाराच्या लीडची बेरीज केली तरी ती दहा हजारांच्या पुढे जात नाही. शक्तिहीन विरोधकांच्या जोरावर खासदार रणजितसिंह नाईक निंबाळकर यांनी माढा लोकसभेसाठी पुन्हा एकदा गुडघ्याला बाशिंग बांधले असले तरी मोहिते पाटील यांनी नेत्यांच्या मागेपुढे न पळता सर्वसामान्यांच्या विकासाचे आणि स्वाभिमानाचे राजकारण केले आहे. मोहिते पाटलांना रोखण्यासाठी खासदार रणजितसिंह नाईक निंबाळकर यांनी कितीही ताकद लावली तरी जनमताच्या जोरावर व राजकीय तपश्चर्येच्या बळावर महाराष्ट्रात सत्तेच्या यशोशिखरावर पोहचलेल्या मोहिते पाटीलरूपी वादळात शक्तिहीन निंबाळकर भुईसपाटच होणार हे सांगायला कुण्या ज्योतिष्याची गरज भासणार नाही असा सूर सोलापूर जिल्ह्यातील जाणकारांतून निघत आहे.