शासनाच्या वतीने विविध क्षेत्रातील नामवंत व्यक्तींना पुरस्कार दिले जातात. आता या पुरस्कारामध्ये भर घालण्याची आवश्यकता आहे. कारण शासनाकडून चांगल्या व्यक्तिमत्वांचा गौरव होतो. त्याच पध्दतीने शासकीय जमिनी, सहकारी संस्था गिळंकृत करणाऱ्या व्यक्तींनाही ‘सुपडा साफ’ हा पुरस्कार देऊन शासनाने त्यांचा सन्मान करावा. आणि पालकमंत्री जयकुमार गोरे यांनी पहिला ‘सुपडा साफ’ पुरस्कार खासदार धैर्यशील मोहिते पाटील यांना द्यावा अशा प्रतिक्रिया अकलूजकरांतून उमटत आहेत.

अकलूज (बंडखोर वृत्तसेवा): खासदार धैर्यशील मोहिते पाटील यांनी जिल्हा परिषद व पंचायत समितीच्या निवडणुकीसंदर्भात प्रतिक्रिया देताना भाजपाचा सुपडा साफ करणार असे वक्तव्य केलेले आहे. मात्र त्यांचं व सुपडा साफचं नातं तसं जुनंच आहे. कारण रणजितसिंह मोहिते पाटील यांनी शेतकऱ्यांची डीसीसी बॅंक, धैर्यशील मोहिते पाटील यांनी विजय शुगर, विजय नागरी पतसंस्था या संस्था सुपडा साफ केल्या आहेत. तर त्यांचे चुलते जयसिंह मोहिते पाटील यांनी सुमित्रा पतसंस्था सुपडा साफ करून मोहिते पाटलांनी सूतगिरणी, कुक्कुटपालन आदी संस्थाही सुपडा साफ केलेल्या आहेत. त्याचबरोबर त्यांच्या काही संस्था सुपडा साफ होण्याच्या मार्गावर आहेत. त्यामुळेच जळीस्थळी खासदार धैर्यशील मोहिते पाटलांना सुपडा साफच दिसत आहे अशा प्रतिक्रिया माळशिरस तालुक्यातील जनतेतून निघत आहेत. 

सत्ताधाऱ्यांनी जनतेचा विकास करायचा असतो. परंतु मोहिते पाटील सत्तेत असताना जनतेचा विकास करण्याऐवजी स्वतःचाच विकास करून त्यांनी फक्त आणि फक्त सुपडा साफच केलेला दिसून येतोय. अकलूज येथील नवीन पोलिस स्टेशनलगतच शंकरराव मोहिते पाटील सहकारी वाहतूक संघाची आजच्या बाजार मूल्यानुसार जवळजवळ २५ कोटी रूपयांची जागा आहे. त्याठिकाणी जुन्या चारचाकी गाड्यांची विक्री करणाऱ्या डीएमपी मोटर्सला दरमहा ५० हजार रूपये भाडेतत्वावर ती जागा दिली असल्याची चर्चा आहे. तर काहींच्या मते यामध्ये खासदार धैर्यशील मोहिते पाटील यांची पार्टनरशीप असल्याची चर्चा आहे. त्यामुळे सहकारी वाहतूक संघाची ही जागा शासनाच्या परवानगीशिवाय भाडेतत्वावर देण्याचा मोहिते पाटलांना अधिकार आहे का? आणि ती वाहतूक संघातील सदस्यांना हाताशी धरून भाड्याने देण्याचा ठराव मंजुर केला असेल तर दरमहा त्याचे भाडे शंकरराव मोहिते पाटील वाहतूक संघाच्या अकाउंटवर जमा होते का? की आपल्या अधिकाराचा गैरवापर करून खासदार धैर्यशील मोहिते पाटील सदरचे भाडे गिळंकृत करतात याचा तपास होणे गरजेचे आहे. तसेच सध्या शंकरराव मोहिते पाटील वाहतूक संघाची काय परिस्थिती आहे? या संस्थेचं ऑफिस कुठं आहे? याचाही शोध घेणं गरजेचं आहे. त्याचबरोबर डीएमपी मोटर्सच्या मागील बाजूला शिवरत्न शिक्षण संस्थेची फ्री विंग्ज ही प्ले ग्रुप, नर्सरी, ज्युनियर के.जी., सीनियर के.जी. याच जागेत सुरू आहे. त्यांना ही जागा कशा पध्दतीने दिलेली आहे याचाही शोध घेणे गरजेचे आहे. याप्रकरणी खासदार धैर्यशील मोहिते पाटील यांनी खुलासा करावा.

त्याचबरोबर शंकरनगर येथील कुस्ती आखाडाच्या बाजूला जिल्हा परिषदेची शाळा होती. मात्र ही शाळाच शिवरत्न शिक्षणसंस्थेने सुपडा साफ केल्याची स्थानिक लोकांतून चर्चा होत आहे. जिल्हा परिषदेच्या शाळेत गोरगरीब मुले मोफत शिक्षण घेत होती. मात्र हीच शाळा सुपडा साफ केल्यामुळे जवळच्या गरीब विद्यार्थ्यांची गैरसोय होत आहे. या शाळेत शिवरत्न शिक्षणसंस्थेने सेमी इंग्लिश स्कूल सुरू केली आहे. प्राईम लोकेशनची ही जागा संस्थेने कशी घेतली? यासाठी जिल्हा परिषदेची परवानगी घेतली होती का? याबद्दल शिवरत्न शिक्षणसंस्थेच्या अध्यक्षांनी खुलासा करावा. यासंदर्भातील शंका कुशंका दूर करण्यासाठी विशेष चौकशी पथकाची नेमणूक करावी अशी चर्चा नागरिकांतून होत आहे. तसेच याप्रकरणी पालकमंत्री जयकुमार गोरे यांनी जातीने लक्ष घालून वरील दोन्ही प्रकरणाची चौकशी करावी अशी मागणी अकलूजकरांतून होत आहे.