अकलूज (बंडखोर वृत्तसेवा): राजकारणात वरच्या लेव्हलला कधी काय होईल ते सांगता येत नाही. शरद पवार महायुतीत सामील झाल्यावर राम सातपुते यांना कोण विचारतोय? आता मोहिते पाटलांच्या विरोधात तोफा डागणाऱ्या राम सातपुते यांना वरिष्ठांच्या आदेशानुसार गप्प राहून मोहिते पाटलांशी जुळवून घ्यावे लागेल व मोहिते पाटलांना सत्तेत वाटा मिळेल अशा स्वप्नरंजन दुनियेत मोहिते पाटील समर्थक वावरत आहेत. तर शरद पवार व भाजपाच्या वरिष्ठ नेत्यांची जवळीक पाहून खिंडीत सापडलेल्या शिवरत्नवरील मोहिते पाटलांनाही गुदगुल्या होत असल्या तरी भाजपाशी गद्दारी करणाऱ्या मोहिते पाटील यांनी सत्तेची स्वप्नं बघू नयेत अशा प्रतिक्रिया निष्ठावंत भाजपा कार्यकर्त्यांतून उमटत आहेत.

२००९ च्या पंढरपूर विधानसभा मतदारसंघातील दारुण पराभवानंतर राजकीय विजनवासात गेलेल्या संधीसाधू मोहिते पाटलांनी सोलापूर जिल्ह्याच्या राजकारणात आपलाच वरचष्मा असावा यासाठी धडपड केली. पण अजितदादांच्या आशीर्वादाने माढ्याचे शिंदे बंधू व पंढरपूरकर परिचारक यांनी त्यांची गोची केल्याने हवालदिल झालेल्या मोहिते पाटलांनी भाजपाची वाट धरली. तेव्हा शक्तीहीन झालेल्या मोहिते पाटलांना भाजपाने २०१९ साली आमदारकीसह शंकर कारखान्याला ११३ कोटींची आर्थिक मदत करुन ताकद दिली. पण भाजपाच्या खासदार व आमदाराने आम्हाला विश्वासात घेऊनच कामे करावीत अशी त्यांची अपेक्षा! मात्र माढा लोकसभा मतदारसंघातून खासदार झालेले रणजितसिंह नाईक निंबाळकर व माळशिरस विधानसभा मतदारसंघातून आमदार झालेले रामभाऊ सातपुते त्यांच्या या अशक्य अपेक्षा कशा पूर्ण करतील? खासदार रणजितसिंह नाईक निंबाळकर यांनी शिवरत्न बंगल्यावर न जाता आपली पाच वर्षाची कारकीर्द स्वतंत्र विचाराने पूर्ण केल्याने मोहिते पाटलांनी त्यांच्या उमेदवारीला प्रखर विरोध करुन भाजपाच्या विरोधात दंड थोपटले. वास्तविक पाहता रणजितसिंह मोहिते पाटील यांना भाजपाने विधानपरिषदेची आमदारकी दिली. मात्र खासदार रणजितसिंह नाईक निंबाळकर यांच्या प्रचारासाठी पंतप्रधान नरेंद्र मोदी माळशिरसला आले असताना रणजितसिंह त्यांच्या सभेला गेले नाहीत. अकलूजला मुख्यमंत्री देवेंद्र फडणवीस आले असता त्यांच्याही सभेला गेले नाहीत. परंतु जेव्हा आपले बंधू धैर्यशील मोहिते पाटील यांनी भाजपाचे उमेदवार रणजितसिंह नाईक निंबाळकर यांचा पराभव केला तेव्हा धैर्यशील यांना मिठी मारुन ते गुलालात न्हाऊन निघाले. त्यानंतर विधानसभा निवडणुकीत रामभाऊ सातपुते यांच्या विरोधात राष्ट्रवादी काँग्रेस शरद पवार गटाकडून उमेदवार असलेल्या उत्तम जानकर यांच्या प्रचारासाठी आपला संपूर्ण परिवार कामाला लावला. मात्र भाजपाचे विधानपरिषदेचे आमदार असताना रणजितसिंह मोहिते पाटील यांनी रामभाऊ सातपुते यांचे काम न करता एससीच्या बोगस जातीच्या दाखल्याआधारे माळशिरस विधानसभा मतदारसंघातून निवडणूक लढविणाऱ्या उत्तम जानकरांच्या मांडीला मांडी लावून त्यांच्या विजयासाठी सर्वतोपरी प्रयत्न केले. वास्तविक पाहता रणजितसिंह मोहिते पाटील हे पूर्वीपासूनच अहंकारी प्रवृत्तीचे! कुणी नमस्कार केला तरी त्याच्याकडे ते बघत नसत. माजी उपमुख्यमंत्री विजयसिंह मोहिते पाटलांचे ते सूपुत्र म्हटल्यावर त्यांच्यासाठी आकाशच ठेंगणे! राजकारणात आम्ही काहीही करु शकतो हा जो अहंकार आहे तो रणजितसिंह मोहिते पाटील यांना विनाशाकडे घेऊन जात आहे. विधानसभा निवडणुकीत झालेल्या पराभवानंतर गद्दार रणजितसिंह मोहिते पाटील यांची भाजपातून हकालपट्टी करावी यासाठी रामभाऊ सातपुते यांनी पूर्ण ताकद लावली आहे. वेळोवेळी ते आपल्या भाषणातून रणजितसिंहांचे वाभाडे काढत आहेत. तर ट्विटरवर देखील त्यांच्या विरोधात सतत पोस्ट टाकून रणजितसिंह मोहिते पाटील यांचा पक्ष द्रोह पक्षश्रेष्ठींंच्या निदर्शनास आणून देत आहेत. रणजितसिंह मोहिते पाटील यांनी साताऱ्यातील एका आमदाराला भाजपाच्या ५० ही जागा येणार नाहीत, त्यामुळे तुम्ही राष्ट्रवादी काँग्रेस शरद पवार गटात आला तर मंत्री व्हाल असे म्हणून त्यांना भाजपातून फोडण्याचा प्रयत्न केला होता. मात्र महाराष्ट्रात पुन्हा एकदा महायुतीची सत्ता येताच व देवेंद्र फडणवीस मुख्यमंत्री होताच त्यांना भेटण्यासाठी रणजितसिंहांनी धडपड सुरू केली आहे. पण रामभाऊ सातपुते त्यांच्या मनसुब्यांवर पाणी फिरवत आहेत. लोकसभा व विधानसभा निवडणुकीत पक्षाशी गद्दारी करणारे रणजितसिंह मोहिते पाटील यांना भाजपा पक्षश्रेष्ठींसमोर जाताना व मुख्यमंत्री देवेंद्र फडणवीस यांना भेटण्यासाठी धडपडताना काहीच कसे वाटत नाही? असे भाजपातील बरेच कार्यकर्ते बोलताना दिसतात. पण पाण्यातून माशाला बाहेर काढल्यावर जशी त्याची तडफड होते तशी यांची सत्तेशिवाय तडफड होतेय म्हटल्यावर बिचारे ते तरी काय करणार? त्यातच शरद पवार व भाजपाच्या वरिष्ठ नेत्यांच्या वाढत्या गाठीभेटीमुळे सत्तेच्या दाराकडे शिवरत्नवरील मोहिते पाटील आशाळभूत नजरेने पाहत आहेत. शरद पवार महायुतीत सहभागी होतील व आपल्याला सत्ता मिळेल म्हणून मोहिते पाटलांना गुदगुल्या होत असून त्यांच्यासह त्यांचे कार्यकर्तेही स्वप्नरंजन दुनियेत जगताना दिसत आहेत. त्यामुळे गद्दार रणजितसिंह मोहिते पाटील व त्यांच्या समर्थकांनी सत्तेत सहभागी होण्याची स्वप्नं बघू नयेत अशा संतप्त प्रतिक्रिया भाजपा कार्यकर्त्यांतून उमटत आहेत.